ព្យុះកំណាច Florence បានបំផ្លាញរដ្ឋចំនួន២ គឺរដ្ឋការ៉ូលីណាខាងជើងនិង ខាងត្បូង បំផ្លាញទ្រព្យសម្បត្តិនិងអាយុជីវិតជាច្រើន ។ មកទល់ពេលនេះពលរដ្ឋនៅមិនទាន់អាចវិលត្រឡប់ទៅកាន់ផ្ទះសម្បែងរបស់ខ្លួននៅឡើយ ទេ។
ប្រធានាធិបតីអាមេរិកនៅព្រឹកថ្ងៃទី២០ខែកញ្ញានេះបានទៅកាន់តំបន់ភាគខាងជើង រដ្ឋ Carolina ដើម្បីត្រួតពិនិត្យ ការខួចខាត និងសួរសុខទុក្ខដល់ពលរដ្ឋ ដែលរង្គ្រោះដោយព្យុះ Florence បង្កឡើង។
នៅតំបន់ New Bern ភាគខាងជើង រដ្ឋ Carolina ប្រធានាធិបតីត្រាំ បានចែកចាយស្បៀងអាហារដល់ពលរដ្ឋ ដោយផ្ទាល់ដៃ ។ ពលរដ្ឋក្នុងតំបន់បានបង្ហាញការសប្បាយចិត្តខ្លាំង ដែលបានប្រធានាធិបតី មកសួរសុខទុក បើទោះបីពលរដ្ឋរងការបាត់បង់ទ្រព្យសម្បត្តិជាច្រើនដោយការបំផ្លាញពីព្យុះFlorence។
តាមរបាយការណ៍ ពីមន្ត្រីគ្រប់គ្រងគ្រោះអាសន្នក្នុងតំបន់បានបព្ជាក់ថា ព្យុះ Florence បានសម្លាប់មនុស្ស៣៧នាក់ ។ក្នុងពេលជាមួយគ្នានេះ អភិបាលរដ្ឋ North Carolina បានអំពាវនាវដល់ពលរដ្ឋរាប់ពាន់នាក់ ដែលបានភៀសខ្លួន ក៏មិនទាន់វិលត្រឡប់ទៅកាន់ផ្ទះរបស់ខ្លួនវិញ ដោយសារស្ថានភាពមិនទាន់អំណោយផល។
លោកត្រាំបានបញ្ចាក់ពេលទៅសួរសុខទុក្ខពលរដ្ឋថា«យើង នឹងមិនភ្លេចនៅការបាត់បង់របស់អស់លោកអ្នកនោះឡើយយើងនឹងមិនបោះបង់លោកអ្នកឡើយ »។
នៅក្នុងដំណើរទៅសួរសុខទុកពលរដ្ឋ រង្គ្រោះដោយសារព្យុះ របស់ប្រធានាធិបតីដូណាលត្រាំលើកនេះមិនឃើញមានភរិយារបស់លោក ទៅជាមួយនោះឡើយ ដោយសារតែកន្លងមក ពេលទៅសួរសុខទុក្ខពលរដ្ឋរងគ្រោះដោយព្យុះដូចគ្នា ភរិយារបស់លោកត្រាំរងការរិះគន់យ៉ាងខ្លាំង ពេលពាក់ស្បែកជើងគេង ទៅតំបន់រង្គ្រោះដោយព្យុះនិងទឹកជំនន់៕ ម៉េវ សាធី
