ភ្នំពេញ៖រថយន្ត មួយគ្រឿងបុកម៉ូតូមួយគ្រឿងបណ្តាលឱ្យបុរសម្នាក់ស្លាប់ និងម្នាក់ទៀតរងរបួសធ្ងន់ បន្ទាប់ពីកើតហេតុរថយន្តបង្កបើកគេចខ្លួនបាត់ តែប្រជាពលរដ្ឋបានស្គាល់ភិនភាគរថយន្តបង្ក ម៉ាកតូយ៉ូតាហ៊ីលុច្សវីហ្គោពណ៌ទឹកមាស ពាក់ផ្លាកលេខព្រះសីហនុ 2A-9777 ។
ហេតុការណ៍គ្រោះថ្នាក់ចរាចរនេះបានកើតឡើងកាលពីម៉ោង១១យប់ថ្ងៃទី២៤ ខែកញ្ញា ឆ្នាំ២០១៨ នៅចំណុចផ្លូវR6 សង្កាត់ស្រះចក ខណ្ឌដូនពេញ ។
សមត្ថកិច្ចបានឲ្យដឹងថា សពមានឈ្មោះ សំ សាត អាយុ៣០ឆ្នាំ ជនជាតិខ្មែរ មុខរបរធ្វើការនៅធនាគារជាតិនៃកម្ពុជា រស់នៅភូមិស្រែឫស្សី ឃុំអំពិល ស្រុករមាសហែក ខេត្តស្វាយរៀង ។ ចំណែកអ្នករងរបួសធ្ងន់មិនទាន់ស្គាល់អត្តសញ្ញាណនៅឡើយទេ។
ប្រភពពត៌មាននៅកន្លែងកើតហេតុបានឲ្យដឹងថា គេឃើញបុរស២នាក់បើកម៉ូតូមួយគ្រឿងម៉ាកហុងដាឌ្រីមសង់ស៊េរីឆ្នាំ២០១៧ សេ១២៥ពណ៌ខ្មៅ ពាក់ផ្លាកលេខ ភ្នំពេញ1GD-5850 តាមបណ្តោយផ្លូវ R6 ក្នុងទិសដៅពីលិចទៅកើត ។
ខណៈមកដល់ចំណុចកើតហេតុ ស្រាប់តែមានរថយន្តម៉ាកតូយ៉ូតាហ៊ីលុច្សវីហ្គោពណ៌ទឹកមាស បើកតាមបណ្តោយផ្លូវR6 ក្នុងទិសដៅពីត្បូងទៅជើងយ៉ាងលឿនបានបុកជាមួយម៉ូតូពេញទំហឹងបណ្តាលឱ្យបុរសម្នាក់រងរបួសធ្ងន់បាក់ជើងត្រូវបញ្ជូនទៅកាន់មន្ទីពេទ្យ និងម្នាក់ទៀតបោកក្បាលស្លាប់ភ្លាមៗនៅនឹងកន្លែងកើតហេតុ ។ ចំណែករថយន្តព្យាយាមបើករត់គេចខ្លួនតែមានពលរដ្ឋដេញថតបានផ្លាកលេខរថយន្ត។
បន្ទាប់ពីកើតហេតុម៉ូតូជនរងគ្រោះត្រូវបញ្ជូនទៅការិយាល័យចរាចរផ្លូវគោករាជធានីភ្នំពេញ រងចាំបងប្អូនជនរងគ្រោះយកឯកសារមកទទួលវិញ រីឯសពត្រូវបានប្រគល់ជូនសាច់ញាតិធ្វើបុណ្យតាមប្រពៃណី ៕ ជ្រោយពេជ្រ
