ភ្នំពេញ៖ យុវជនម្នាក់ជិះម៉ូតូមិនប្រុងប្រយ័ត្នក្នុងល្បឿនលឿនជ្រុលបុករថយន្តបណ្ដាលអោយ រងរបួសខ្លួនឯងបាក់ដៃស្ដាំនិងបែកថ្ងាស យ៉ាងធ្ងន់ ។
ហេតុការណ៍គ្រោះថ្នាក់ចរាចរណ៍នេះបានកើតឡើងកាលពីវេលាម៉ោង០២និង៥០នាទីរសៀលថ្ងៃទី២៦ ខែវិច្ចិការ ឆ្នាំ២០១៥ ស្ថិតនៅចំណុចមុខតុលាការកំពូល តាមមហាវិថីសម្ដេចសុធារស កែងនិងវិថី ឧកញ្ញ៉ា ឈុន ក្នុងសង្កាត់ជ័យជំនះ ខណ្ឌដូនពេញ។
សមត្ថកិច្ចចរាចរណ៍មូលដ្ឋានបានអោយដឹងថា នៅមុនពេលកើត ឃើញមានយុវជនម្នាក់ជិះម៉ូតូម៉ាកស្ទែប ពណ៌ខ្មៅ គ្មានស្លាកលេខ ធ្វើដំណើរតាមបណ្ដោយមហាវិថីសម្ដេចសុធារស ក្នុងទិសដៅពីត្បូងទៅជើង ក្នុងល្បេឿនយ៉ាងលេឿន ខណៈនោះ មានរថយន្ត១គ្រេឿងម៉ាកសាំយុងធ្វើដំណើរតាមវិថី ឧកញ្ញ៉ា ឈុន ក្នុងទិសដៅពីលិចទៅកើត ពេលមកដល់ចំណុចមុខតុលាការកំពូល យុវជនជិះម៉ូតូបានទៅបុករថយន្តសាំយុងយ៉ាងពេញទំហឹង បណ្ដាលអោយយុវជននោះរងរបួសបាក់ដៃស្ដាំនិងបែកថ្ងាស យ៉ាងធ្ងន់ធ្ងរតែម្ដង។
ក្រោយពេលហេតុសមត្ថកិច្ចចរាចរណ៍បានចុះមកដល់កន្លែងកើតហេតុភ្លាមៗ ធ្វើការវាស់វែង។ចំណែកជនរងគ្រោះត្រូវបានសមត្ថកិច្ចហៅរថយន្តសង្គ្រោះបន្ទាន់ដឹកទៅព្យាបាលនៅមន្ទីពេទ្យ។
បច្ចុប្បន្នរថយន្តរួមទាំងម៉ូតូរបស់ជនរងគ្រោះត្រូវបានសមត្ថកិច្ចនាំយកទៅរក្សារទុកដើម្បីដោះស្រាយតាមនីតិវិធី ៕
ដោយ៖ ស រស្មី
