ក្រុមរដ្ឋអិស្លាមប្រកាសទទួលស្គាល់ការវាយប្រហារនៅបង់ក្លាដែស

ចែករំលែក៖

ក្រុមរដ្ឋអិស្លាម IS បានប្រកាសទទួលស្គាល់ការវាយប្រហារទៅលើទីតាំងព្រះវិហារនិកាយស៊ីអ៊ីដមួយកន្លែងស្ថិតនៅភាគខាងជើងប្រទេសបង់ក្លាដែស ដែលបណ្តាលឲ្យមនុស្សម្នាក់បាត់បង់ជីវិត និង៣នាក់ផ្សេងទៀតរងរបួស ។

desdc

ជនវាយប្រហារបានចូលទៅកាន់ព្រះវិហារសាសនានិកាយស៊ីអ៊ីដ ស្ថិតនៅក្នុងតំបន់ Shibganj ចម្ងាយ១២៥គីឡូម៉ែត្រភាគខាងជើងទីក្រុង Dhaka នៅអំឡុងពេលល្ងាច ខណៈដែលមានការជួបជុំដើម្បីប្រារព្ធពិធីបួងសួងកាលពីថ្ងៃទី២៦ ខែវិច្ឆិកា ឆ្នាំ២០១៥ ហើយជនវាយប្រហារបន្ទាប់ពីធ្វើសកម្មភាព បានរត់គេចខ្លួនបាត់ស្រមោល ។

បណ្តាញទូរទស្សន៍ក្នុងស្រុកបានផ្សព្វផ្សាយឲ្យឃើញរូបភាពកម្ទេចកម្ទីបាក់បែកនៅក្នុងព្រះវិហារខាងលើនេះ ព្រមទាំងស្នាមឈាមប្រឡាក់នៅលើឥដ្ឋការ៉ូផងដែរ ។

ប៉ូលិសបានអះអាងថា ខ្មាន់កាំភ្លើងបានបាញ់សម្លាប់អាចារ្យម្នាក់ និង៣នាក់ទៀតរងរបួស ។ នេះជាការវាយប្រហារដ៏កម្រមួយដែលបានកើតឡើងនៅក្នុងព្រះវិហារនិកាយសស៊ីអ៊ីដនៅក្នុងប្រទេសដែលមានពលរដ្ឋកាន់សាសនាមូស្លីមរស់នៅច្រើនជាងគេបំផុតនោះ ។

ក្រុមចារកម្មរបស់បង់ក្លាដែសដែលត្រួតពិនិត្យទៅលើសកម្មភាពក្រុមជីហាដនិយមនោះបានផ្សព្វផ្សាយនៅលើគេហទំព័ររបស់ខ្លួនថា ក្រុមរដ្ឋអិស្លាម (IS) បានប្រកាសទទួលស្គាល់ការវាយប្រហារនេះ នៅតាមប្រព័ន្ធទំនាក់ទំនងសង្គម Twitter របស់ខ្លួន ។

អាជ្ញាធរបង់ក្លាដែស កាលពីពេលកន្លងមកបានអះអាងថា ពួកគេរកមិនឃើញភស្តុតាងថា មានក្រុមរដ្ឋអិស្លាមមានវត្តមាន និងធ្វើសកម្មភាពនៅក្នុងទឹកដីបង់ក្លាដែសនោះទេ ។

ទោះបីយ៉ាងណាក៏ដោយ ក្រុមរដ្ឋអិស្លាមបានប្រកាសទទួលស្គាល់ការវាយប្រហារនៅក្នុងប្រទេសបង់ក្លាដែស ក្នុងនោះមានការបាញ់ប្រហារបណ្តាលឲ្យស្លាប់ និងរងរបួសព្រះសង្ឃសញ្ជាតិអ៊ីតាលី និងបាញ់ប្រហារទៅលើព្រះចៅអធិការប្រចាំនៅព្រះវិហារមូស្លីម Sufi ក្នុង២កន្លងនេះផងដែរ ។

សន្តិសុខនៅទូទាំងប្រទេសត្រូវរឹតបន្តឹង ក្រោយមេដឹកនាំបក្សប្រឆាំង២រូបត្រូវកាត់ទោសប្រហារជីវិតដោយការព្យួរកនោះដោយសារតែជាប់ពាក់ព័ន្ធបទឧក្រិកម្មសង្គ្រាមឆ្នាំ១៩៧១ ប្រឆាំងទៅលើប៉ាគីស្ថាន ។

លោក Ahsan Habib ស្នងការប៉ូលិសក្នុងតំបន់បានបញ្ជាក់ថា ប៉ូលិសបាននាំខ្លួនជនសង្ស័យ២នាក់ដែលជាអ្នកកាន់សាសនាអិស្លាមនិកាយសាន់នីនៅក្នុងតំបន់ដើម្បីសួរនាំពាក់ព័ន្ធករណីបាញ់ប្រហារនេះ ។ ប៉ុន្តែមិនទាន់មានការចាប់ខ្លួននរណាម្នាក់នៅឡើយទេ ។

ការវាយប្រហារនេះបានកើតឡើងមួយថ្ងៃ បន្ទាប់ពីប៉ូលិសបានបាញ់សម្លាប់មេឧទ្ទាមក្រុមអិស្លាមជ្រុលនិយមម្នាក់ដោយចោទប្រកាន់ពីបទគប់គ្រាប់បែកចូលទៅកាន់ព្រះវិហារស៊ីអ៊ីដក្នុងរដ្ឋធានី Dhaka កាលពីខែមុន បណ្តាលឲ្យស្លាប់មនុស្ស២នាក់ ។

ការបំផ្ទុះគ្រាប់បែកនេះត្រូវគេជឿថា បានកើតឡើងជាលើកដំបូងបំផុតទៅលើក្រុមអិស្លាមនិកាយស៊ីអ៊ីដនៅក្នុងប្រទេសបង់ក្លាដែស ។ បើទោះបីជាមានការរឹតបណ្តឹងសន្តិសុខរឹងមាំ ក្រុមរដ្ឋអិស្លាមជ្រុលនិយមនៅតែបើកការវាយប្រហារសម្លាប់មនុស្សរាប់សិបនាក់ ដែលសុទ្ធជាក្រុមមូស្លីម Sufi និងការវាយប្រហារទៅលើក្រុម Hindus និងក្រុម Christian ផងដែរ កាលពី២ឆ្នាំកន្លងមក ៕

banglades