ខេត្តបាត់ដំបង៖ ដោយសារភាពស្មោះស្ម័គ្រនឹងស្នេហា ភក្ដីនឹងនារីជាគូសង្សារកំណាន់ចិត្ត បុរសម្នាក់ត្រូវម្ដាយខាងស្រ្ដីប្រើល្បិចល្បូងឲ្យចូលអន្ទាក់ជាប់ខ្នោះសមត្ថកិច្ច ព្រោះតែរូបគេបានទៅសំងំរួមរស់ជាមួយនឹងកូនក្រមុំគេអស់រយៈពេលជាង១០ថ្ងៃ។
ការឃាត់ខ្លួនយុវជនខាងលើនេះ បានធ្វើឡើងកាលពីវេលាម៉ោង១១ និង៣០នាទីយប់ ថ្ងៃទី២៩ ខែវិច្ឆិកា ឆ្នាំ២០១៥ នៅផ្ទះនាងជាសង្សារក្នុងភូមិដូង ឃុំចែងមានជ័យ ស្រុកបាណន់ ខេត្តបាត់ដំបង។
ប្រភពព័ត៌មានពីសមត្ថកិច្ចបានឲ្យដឹងថា យុវជនដែលត្រូវសមត្ថកិច្ចឃាត់ខ្លួននេះឈ្មោះ លឿប សុវណ្ណា ហៅវ៉ិត អាយុ២៥ឆ្នាំ រស់នៅភូមិអូរពងមាន់ ឃុំតាគ្រាម ស្រុកបាណន់ ខេត្តបាត់ដំបង។ រីឯនារីរងគ្រោះមានឈ្មោះ ឡ ស ល អាយុ២០ឆ្នាំ រស់នៅត្រង់ចំណុចឃាត់ខ្លួនខាងលើ។
តាមប្រភពបានឲ្យដឹងថា ការឃាត់ខ្លួនយុវជនខាងលើ គឺយោងតាមពាក្យបណ្ដឹងរបស់ម្ដាយឪពុកខាងស្រ្ដី បន្ទាប់ពីពួកគាត់បានដឹងថា យុវជនខាងលើនេះបានទៅរួមរស់ជាមួយនឹងកូនក្រមុំពួកគាត់អស់រយៈពេលជាង១០ថ្ងៃ។
តាមសម្ដីរៀបរាប់របស់យុវជនដែលត្រូវឃាត់ខ្លួនបានរៀបរាប់ថា កន្លងមករូបគេ និងនាងខាងលើធ្លាប់មានការទំនាក់ទំនងស្នេហាជាមួយគ្នាជាយូរមកហើយ នៅមុនពេលឃាត់ខ្លួនប្រមាណជាង១០ថ្ងៃ គឺតាំងពីថ្ងៃទី១៥ ខែវិច្ឆិកា ឆ្នាំ២០១៥ ខណៈដែលខ្លួនកំពុងតែនៅផ្ទះ ក្នុងភូមិអូរពងមាន់ ក៏ស្រាប់តែនាងជាគូសង្សារដែលខ្លួនស្រលាញ់ បានធ្វើដំណើរទៅដល់ផ្ទះរបស់ខ្លួន ហើយក៏បានរស់នៅទីនោះតែម្ដង ដោយនាងមិនព្រមចាកចេញទៅទីណានោះឡើយ ទោះបីជាខ្លួនបានប្រាប់នាងឲ្យត្រឡប់ទៅផ្ទះវិញក៏ដោយ ក៏នាងមិនព្រមដែរ។ ចាប់តាំងពីពេលនោះមក គឺក្នុងរយៈពេលជាង១០ថ្ងៃនេះ នាងបានចូលមកសម្រាកជាមួយខ្លួនរាល់យប់ មិនដែលខានយប់ណាឡើយ។ ដោយហេតុតែចិត្តស្រលាញ់ ហើយខ្លួនក៏មានចិត្តស្រលាញ់ទៅលើនាងវិញយ៉ាងខ្លាំងណាស់ដែរ គឺមិនចង់ឲ្យនាងបែកទៅណានោះឡើយ ទើបព្រមឲ្យនាងនៅជាមួយតែម្ដងទៅ។ រយៈពេលដែលរួមរស់ជាមួយគ្នាប៉ុន្មានថ្ងៃនេះ ខ្លួនក៏បានរួមភេទជាមួយនាងគ្មានលោះមួយយប់ណានោះឡើយ ហើយក៏គ្មានការបង្ខំដែរ ដោយនាងក៏ព្រមប្រគល់ខ្លួនប្រាណមកឲ្យដោយសុទ្ធចិត្ត។
យុវជនដដែលបន្ដថា លុះនៅថ្ងៃកើតហេតុ នាងក៏បានវិលត្រឡប់ទៅផ្ទះរបស់នាងវិញ។ នៅយប់នោះហើយ ក្រុមគ្រួសាររបស់នាងបានទូរស័ព្ទទៅខ្លួន ដោយប្រាប់ឲ្យខ្លួនធ្វើដំណើរទៅផ្ទះនាងទាំងយប់ ដើម្បីនិយាយពីរឿងរបស់ពួកគេ។ ពេលនោះគេក៏បានធ្វើដំណើរទៅផ្ទះនាងជាសង្សារទាំងយប់ តែពេលទៅដល់ក៏ត្រូវកម្លាំងនគរបាលចាប់ដាក់ខ្នោះតែម្ដង។
ក្រោយពីយុវជនខាងលើត្រូវចាប់ខ្លួន មានការរិះគន់យ៉ាងច្រើនពីសំណាក់អ្នកជិតខាង ក៏ដូចជាសាច់ញាតិខាងប្រុស ពួកគេបានលើកឡើងថា នេះមិនមែនជាការបង្ខិតបង្ខំនោះទេ អ្វីៗដែលកើតឡើង គឺសុទ្ធតែជាការស្មោះស្ម័គ្រទាំងសងខាង។ ម្យ៉ាងវិញទៀត រឿងនេះក៏មិនមែនជាកំហុសរបស់ខាងប្រុសទាំងស្រុងនោះដែរ ដំបូងឡើយគឺខាងស្រីនោះទេ ដែលទៅរួមរស់ជាមួយគេ ដែលទោះបីជាគេប្រាប់ពន្យល់យ៉ាងណាក៏មិនព្រមចេញ។ យ៉ាងណាៗរឿងនេះ គឺមិនអាចយកហិង្សាមកដោះស្រាយបាននោះទេ បើអង្ករវាជ្រុលក្លាយជាបាយទៅហើយ គួរតែសម្រួលគ្នាឲ្យពួកគេទាំង២នាក់រួមរស់នៅជាមួយគ្នាទៅ ព្រោះថាពួកគេស្រឡាញ់គ្នាណាស់។
បើទោះបីជាមានការរិះគន់យ៉ាងណាក្ដី នៅថ្ងៃកើតហេតុ ភាគីខាងស្រីនៅមិនទាន់មានទំនោរលើការចរចារជាមួយខាងប្រុសនៅឡើយទេ។ ដោយឡែកបច្ចុប្បន្ន សមត្ថកិច្ចកំពុងតែរៀបចំឯកសារដើម្បីបញ្ជូនខ្លួនយុវជនរូបនេះទៅកាន់សាលាដំបូងខេត្ត ដើម្បីមានចំណាត់ការតាមផ្លូវច្បាប់៕
ដោយ៖ សហការី
