ខេត្តព្រះវិហារ៖ ជនសង្ស័យម្នាក់ក្នុងចំណោម២នាក់ ត្រូវបានកម្លាំងកងរាជអាវុធហត្ថខេត្តព្រះវិហារ ឃាត់ខ្លួនពីបទមនុស្សឃាតដោយចេតនា ក្នុងជម្លោះពេលផឹកស៊ីជាមួយគ្នា កាលពីថ្ងៃទី២៨ ខែវិច្ឆិកា ឆ្នាំ២០១៥ កន្លងទៅនេះ នៅចំណុចមុខវត្តកណ្តោលកោះ ភូមិទី១០ ឃុំកោះសូទិន ស្រុកកោះសូទិន ខេត្តកំពង់ចាម ។
ការចាប់ខ្លួនជនសង្ស័យនេះ បានធ្វើឡើងកាលពីវេលាម៉ោង៨និង៣០នាទីព្រឹក ថ្ងៃទី១ ខែធ្នូ ឆ្នាំ២០១៥ នៅផ្ទះបងស្រីរបស់ជនសង្ស័យ ស្ថិតក្នុងភូមិស្រអែមជើង ឃុំស្រអែម ស្រុកជាំក្សាន្ត ខេត្តព្រះវិហារ ។
ជនជាប់ចោទ ឈ្មោះ សុំ ពិសី ភេទប្រុស អាយុ២៨ឆ្នាំ រស់នៅក្នុងភូមិទី១០ ឃុំកោះសូទិន ស្រុកកោះសូទិន ខេត្តកំពង់ចាម ។ ចំណែកជនសង្ស័យម្នាក់ទៀតបានរត់គេចខ្លួនបាត់ ឈ្មោះ សុំ លាប ត្រូវជាបងប្រុងសបង្កើតរបស់ជនសង្ស័យ សុំ ពិសី ។
ប្រភពព័ត៌មានពីកម្លាំងកងរាជអាវុធហត្ថខេត្តកំពង់ចាម បានឲ្យដឹងថា ការឃាត់ខ្លួនជនសង្ស័យខាងលើដោយសារតែគេបានយកដំបងវ៉ៃជនរងគ្រោះ ឈ្មោះ ថន វត្ថា ភេទប្រុស អាយុ៣០ឆ្នាំ រស់នៅភូមិ-ឃុំជាមួយជនសង្ស័យខាងលើ បណ្តាលឲ្យស្លាប់ ក្រោយពីក្រុមគ្រួសារ បានបញ្ជូនជនរងគ្រោះដល់មន្ទីរពេទ្យ ។
បច្ចុប្បន្នជនសង្ស័យ ត្រូវបានកម្លាំងកងរាជអាវុធហត្ថខេត្តព្រះវិហារ កសាងសំណុំរឿងប្រគល់ទៅឲ្យកម្លាំងកងរាជអាវុធហត្ថ ខេត្តកំពង់ចាម ដើម្បីចាត់ការតាមនីតិវិធី ៕
ដោយ៖ សហការី
