ភ្នំពេញ៖ ដើម្បីចូលរួមចំណែកប្រយុទ្ធប្រឆាំង និងទប់ស្កាត់បទឧក្រិដ្ឋឆ្លងដែនក្នុងក្របខណ្ឌទ្វេភាគីនិងអន្តរជាតិ ព្រឹទ្ធសភាកម្ពុជាបានឯកភាពឲ្យរាជរដ្ឋាភិបាលធ្វើបត្យាប័នអ្នកទោសជាមួយសហព័ន្ធរុស្ស៊ី ។
បន្ទាប់ពីបញ្ចប់សម័យប្រជុំលើកទី២ ព្រឹទ្ធសភា នីតិកាលទី៤ ក្រោមអធិបតីភាពដ៏ខ្ពង់ខ្ពស់របស់សម្តេចវិបុលសេនាភក្តី សាយ ឈុំ ប្រធានព្រឹទ្ធសភាកាលពីថ្ងៃទីថ្មីៗនេះ លោក ម៉ម ប៊ុន នាង សមាជិក និង ជាអ្នក នាំពាក្យ ព្រឹទ្ធសភាមានប្រសាសន៍ថា អង្គព្រឹទ្ធសភាបានពិនិត្យ និងឲ្យយោបល់ឯកភាពទាំងស្រុង លើសេចក្តីព្រាងច្បាប់ស្តីពីការអនុម័តយល់ព្រមលើសន្ធិសញ្ញាស្តីពីបត្យាប័នរវាងកម្ពុជានិងសហព័ន្ធរុស្ស៊ីទាំងមូល ដោយឥតកែប្រែចំនួន ៥៧សំឡេង នៃចំនួនសមាជិកព្រឹទ្ធសភាទាំងមូលដើម្បីបើកផ្លូវឲ្យរាជរដ្ឋាភិបាលកម្ពុជា និងរុស្ស៊ីដែលអាចចូលរួមប្រយុទ្ធប្រឆាំងទប់ស្កាត់បទឧក្រិដ្ឋឆ្លងដែន ការជួញដូរមនុស្សពិសេសស្ត្រីនិងកុមារ ការប្រយុទ្ធប្រឆាំងនឹងភេរវកម្មការសម្អាតប្រាក់និងហិរញ្ញប្បទានភេរវកម្ម និងការប្រឆាំងអំពើពុករលួយ។
លោកកិត្តិនីតិកោសលបណ្ឌិត ប៊ិន ឈិន ឧបនាយករដ្ឋមន្រ្តីប្រចាំការ រដ្ឋមន្ត្រីទទួលបន្ទុកទីស្តីការគណៈរដ្ឋតំណាងរាជរដ្ឋាភិបាល ជាអ្នកការពារសេចក្តីព្រាងច្បាប់នេះ បានមានប្រសាសន៍ថា បន្ទាប់ច្បាប់នេះ បានដាក់ឲ្យប្រើប្រាស់រួចហើយនោះ នឹងលើកកម្ពស់កិច្ចសហប្រតិបត្តិការរវាងប្រទេសទាំងពីរកម្ពុជា និងសហព័ន្ធរុស្ស៊ី ក្នុងការលុបបំបាត់ឧក្រិដ្ឋកម្មដោយឈរលើគោលការណ៍ គោរពនូវអធិបតេយ្យភាព សមភាព និងមានផលប្រយោជន៍ទៅវិញទៅមក និងជាផ្នែកមួយ នៃកិច្ចសហប្រតិបត្តិការអន្តរជាតិ ក្នុងការរួមចំណែកយ៉ាងសកម្មក្នុងក្របខ័ណ្ឌច្បាប់អន្តរជាតិ។
គួរបញ្ជាក់ថា សន្ធិសញ្ញាស្តីពីបត្យាប័នរវាងព្រះរាជាណាចក្រកម្ពុជា និងសហព័ន្ធរុស្ស៊ីត្រូវបានរដ្ឋាភិបាលប្រទេសទាំងពីរ ចុះហត្ថលេខា កាលពីខែកុម្ភៈ ឆ្នាំ២០១៧នៅរដ្ឋធានីម៉ូស្គូ សហព័ន្ធរុស្ស៊ីដោយព្រមព្រៀងធ្វើបត្យាប័នទៅភាគីម្ខាងទៀតនូវជនទាំងឡាយណាដែលត្រូវបានរកឃើញនៅលើទឹកដីនៃភាគីណាមួយ ហើយកំពុងត្រូវគេតាមចាប់ខ្លួនដើម្បីធ្វើការចោទប្រកាន់ ធ្វើការជំនុំជម្រះក្តី ឬអនុវត្តទណ្ឌកម្មតាមទោសកំណត់នៅលើទឹកដីរបស់ភាគីម្ខាងទៀតចំពោះបទល្មើសណាមួយ៕ សហការី