ឧត្តរមានជ័យ៖ ជនសង្ស័យ៣នាក់ ត្រូវបានសមត្ថកិច្ចចុះអនុវត្តដីកាចាប់ឃាត់ខ្លួន ករណីគំរាមសម្លាប់និង ឆរបោកប្រាក់ចំនួន(ពីរលានដុល្លារអាមេរិក)នៅវេលាម៉ោង ៧និង៣០ នាទីព្រឹក ថ្ងៃ សៅរ៍ ៩ រោច ខែកត្តិក ឆ្នាំ ច សំរឹទ្ធិស័ក ព.ស.២៥៦២ ត្រូវនឹងថ្ងៃទី ១ ខែធ្នូ ឆ្នាំ២០១៨ ។
ប្រតិបត្តិការនេះដឹកនាំដោយលោកវរសេនីយ៍ឯក ស៊ីម វណ្ណៈ អធិការនគរបាលស្រុកអន្លង់វែង សហការជាមួយកម្លាំងនាយកដ្ឋាននគរបាលព្រហ្មទណ្ឌក្រសួងដឹកនាំដោយលោកវរសេនីយ៍ទោ ឆាន់ គឹមលី នាយការិយាល័យអនុវត្តដីកានិងកម្លាំងផែននគរបាលព្រហ្មទណ្ឌ នៃស្នងកាដ្ឋាននគរបាលខេត្តឧត្តរមានជ័យ ដឹកនាំដោយលោក ឧត្តមសេនីយ៍ត្រី ឡឹក សុខា ស្នងការរង។ កម្លាំងចម្រុះ បានចុះស្រាវជ្រាវនិងឃាត់ខ្លួនជនសង្ស័យចំនួន០៣នាក់ នៅចំណុចផ្ទះសំណាក់យីហោ បឹងតាម៉ុក ស្ថិតនៅភូមិអភិឌ្ឍន៍ ឃុំអន្លង់វែង ស្រុកអន្លង់វែង ដែលពាក់ព័ន្ធករណី គំរាមសម្លាប់ និងឆរបោកប្រាក់សរុបចំនួន ២លានដុល្លារអាមេរិក កាលពីអំឡុងឆ្នាំ២០១៥ និងបន្តបន្ទាប់រហូតមកដល់ថ្ងៃទី៣០ ខែវិច្ឆិកា ឆ្នាំ២០១៨ នៅរាជធានីភ្នំពេញ។ សមត្ថកិច្ចឲ្យដឹងថា ជនសង្ស័យទី១-ឈ្មោះ សួស សិរីរ័ត្ន ហៅពៅ ភេទប្រុស អាយុ៥០ឆ្នាំ រស់នៅភូមិវិហារខ្ពស់ ឃុំវាំងចាស់ ស្រុកឧដុង្គ ខេត្តកំពង់ស្ពឺ, ទី២-ឈ្មោះ កែវ ម៉ៅ ភេទប្រុស អាយុ៥០ឆ្នាំ រស់នៅភូមិវត្តកណ្តាល ឃុំរង្សី ស្រុកសង្កែ ខេត្តបាត់ដំបង និងទី៣-ឈ្មោះ ជុំ ស្រស់ ភេទប្រុស អាយុ៥២ឆ្នាំ រស់នៅភូមិឡចាន ឃុំបែកចាន ស្រុកអង្គស្នួល ខេត្តកណ្តាល។ ចំណែកជនរងគ្រោះឈ្មោះ អ៊ុន ពីឌិច ភេទប្រុស អាយុ៥៤ឆ្នាំ បច្ចុប្បន្នស្នាក់នៅផ្ទះលេខ ២០ E១ ផ្លូវលេខ២១៥ ភូមិ១០ សង្កាត់មិត្តភាព ខណ្ឌ៧មករា រាជធានីភ្នំពេញ។
បច្ចុប្បន្នជនសង្ស័យទាំង៣នាក់នេះត្រូវបានកម្លាំង នគរបាលស្រុកអន្លង់វែងបញ្ជូនខ្លួនទៅកាន់នាយកដ្ឋាននគរបាលព្រហ្មទណ្ឌក្រសួងមហាផ្ទៃដើម្បីចាត់ការតាមផ្លូវច្បាប់៕ ប្រាថ្នា
