ភ្នំពេញ៖ យុវជនម្នាក់ជិះម៉ូតូក្នុងល្បឿនលឿនបានជ្រុលចង្កូតទៅបុកម៉ូតូមួយគ្រឿងទៀតដែលជិះពីមុខបណ្ដាលឲ្យរងរបួសធ្ងន់ និងស្រាលពីរនាក់ ។
ហេតុការណ៍គ្រោះថ្នាក់ចរាចរណ៍ខាងលើនេះបានកើតឡើងកាលពីវេលាម៉ោង២០និង០៥នាទី ថ្ងៃទី២ ខែធ្នូ ឆ្នាំ២០១៥ នៅចំណុចមុខកងកម្លាំងអាវុធហត្ថខណ្ឌទួលគោក តាមបណ្ដោយផ្លូវឧញ្ញាទេពផន ស្ថិតក្នុងសង្កាត់ទឹកល្អក់៣ ខណ្ឌទួលគោក រាជធានីភ្នំពេញ ។
ប្រភពព័ត៌មានពីប្រជាពលរដ្ឋដែលនៅកន្លែងកើតហេតុបានអោយដឹងថា មុនពេលកើតហេតុគេឃើញមានម៉ូតូមួយគ្រឿងម៉ាកហុងដាឌ្រីម សេរី២០១៥ ពណ៌ខ្មៅ ពាក់ស្លាកលេខ ភ្នំពេញ 1FF.6470 ជិះដោយបុរសម្នាក់ក្នុងល្បឿលល្មម ខណះពេលមកដល់ចំណុចកើតហេតុស្រាប់តែមាន ម៉ូតូមួយគ្រឿងទៀតម៉ាក ហុងដាវ៉េវ ពណ៌ខ្មៅ ពាក់ស្លាកលេខ សៀមរាប 1B.7532 ជិះដោយយុវជនម្នាក់ក្នុងល្បឿនលឿនខ្វះការប្រុងប្រយ័ត្នជ្រុលទៅ មកបុកពីក្រោយពេញទំហឹងបណ្ដាលឲ្យម៉ូតូទាំងពីរគ្រឿងគៀបជាប់គ្នា និងម្ចាស់ម៉ូតូហុងដាឌ្រីមរងរបួសធ្ងន់ធ្ងន ត្រូវបានរថយន្តសាមុយដឹកយកទៅសង្គ្រោះនៅមន្ទីពេទ្យភ្លាមៗ រីឯម្ចាស់ម៉ូតូហុងដាវ៉េវ រងរបួសស្រាល តែក្រោយពេលបង្កហេតុរួចម្ចាស់ម៉ូតូហុងដាវ៉េវបានគេចខ្លួនបាត់ស្រមោលតែម្ដង ។
ប្រភព័ត៌មានពីសមត្ថកិច្ចបានឲ្យដឹងថា ជនរងគ្រោះមានឈ្មោះសោម សុីណា ភេទប្រុស អាយុ២៤ឆ្នាំ មានស្រុកកំណើតនៅភូមិខ្វាន់មាស ឃុំពត់សរ ស្រុកបាទី ខេត្តតាកែវ។
ក្រោយពេលកើតហេតុជនរងគ្រោះរបួសធ្ងន់ត្រូវបានរថយន្តសាមុយដឹកទៅសង្គ្រោះនៅមន្ទីរពេទ្យភ្លាមៗ ចំណែកឯម៉ូតូទាំងពីរគ្រឿងត្រូវបានសមត្ថកិច្ចជំនាញធ្វើការវាស់វែងយកទៅរក្សាទុកនៅអធិការដ្ឋាននគរបាលខណ្ឌទួលគោក រង់ចាំដោះស្រាលតាមក្រោយ៕
ដោយ៖ ព្រែកជ័យ
