ភ្នំពេញ៖ ជនសង្ស័យម្នាក់រួម​ជា​មួ​យ​ថ្នាំក្រវី ១ចំនួនត្រូវកម្លាំងនគរបាលព្រហ្មទណ្ឌកម្រិតធ្ងន់នៃស្នងការរាជធានីភ្នំពេញឃាត់ខ្លួននៅតាមផ្លូវ ។

ហេតុការណ៍នេះកើតឡើងកាលពីវេលាម៉ោង៤ និង៣០នាទី ថ្ងៃទី២ ខែធ្នូ ឆ្នាំ២០១៥នៅចំណុច ផ្លូវលេខ៩០ សង្កា​ត់ច្រះចក ខណ្ឌដូនពេញ រាជធានីភ្នំពេញ ។

បើតាមប្រភពព័ត៌មានពីលោក តី វិសា នាយរងការិយាល័យព្រហ្មទណ្ឌកម្រិតធ្ងន់នៃស្នងការរាជធានីភ្នំពេញបានឱ្យដឹងថា ជនសង្ស័យដែលត្រូវឃាត់ខ្លួននេះ ​មានឈ្មោះ ទា មិននា ភេទប្រុស អាយុ៣០ឆ្នាំ ស្នាក់នៅផ្ទះជួលលេខ០៤ ផ្លូវ២៩៤ ក្នុងសង្កាត់បឹងកេងកងទី១ ខណ្ឌចំការមន ជាអ្នកចែក​ចាយថ្នាំក្រវី ។

លោក តី វិសា នាយរងការិយាល័យព្រហ្មទណ្ឌកម្រិតធ្ងន់នៃស្នងការរាជធានីភ្នំពេញ បានឱ្យដឹងថាបន្ទាប់ពីចាប់បាន​ជនសង្ស័យចែកចាយថ្នាំក្រវីកម្លាំងរបស់លោកបានតាមស្រាវជ្រាវយូរណាស់មកហើយក៏ស្រាប់តែដល់ថ្ងៃកើតហេតុខាងកម្លាំងរបស់លោកក៏តាមជនសង្ស័យកំពុងតែជិះរថយន្ត១គ្រឿងម៉ាកCOOPER ពណ៍លឿងពាក់ស្លាក់លេខ2AA-9558រហូតក៏មកដល់ចំណុចកើតហេតុខាងលើក៏ត្រូវកម្លាំងរបស់លោកក៏បានធ្វើការឃាត់ខ្លួនបានភ្លាមៗរួចធ្វើការឆែកឆេរក្នុងរថយន្ដក៏បានរកឃើញថ្នាំក្រវី១ចំនួន ក្រោយមកក៏ឈានទៅដល់ចូលឆែកឆេរនៅក្នុងផ្ទះជួលរបស់ជនសង្ស័យមួយកន្លែងដែលស្ថិតនៅតាមបណ្ដោយផ្លូវ២៩៤ ផ្ទះលេខ០៤ ក្នុងសង្កាត់បឹងកេងកងទី១ ខណ្ឌចំការមន ។  ក្នុងការឆែកឆេរនៅផ្ទះជួលខាងលើនេះចូលរួមពីលោក សៀង សុខ ព្រះរាជជ្ញារងអមសាលាដំបូងរាជធានីភ្នំពេញ ។

បច្ចុប្បន្នជនសង្ស័យរួមទាំងវត្ថុតាង ត្រូវបាន​សមត្ថកិច្ចកសាងសំណុំរឿងបញ្ជូន​ទៅការិយាល័យព្រហ្មទណ្ឌកម្រិតធ្ងន់នៃស្នងការរាជធានីភ្នំពេញចាត់ការតាមច្បាប់ ៕

ដោយ៖ ស រស្មី