ខេត្តប៉ៃលិន៖ ឧបទ្ទវហេតុគ្រោះថ្នាក់ចរាចរណ៍មួយរវាងកង់និងម៉ូតូ បណ្ដាលឲ្យបុរសចំណាស់ម្នាក់រងរបួសធ្ងន់ និងបុរសវ័យក្មេងម្នាក់រងរបួសស្រាល។
ហេតុការណ៍នេះ បង្កឲ្យមានការភ្ញាក់ផ្អើលកាលពីវេលាម៉ោង៧ និង៤០នាទីយប់ ថ្ងៃទី៣ ខែធ្នូ ឆ្នាំ២០១៥ នៅចំណុចខាងជើងភ្នំស្ពង់ ស្ថិតក្នុងភូមិភ្នំស្ពង់ ឃុំសាលាក្រៅ ស្រុកសាលាក្រៅ ខេត្តប៉ៃលិន។
ប្រភពព័ត៌មានពីកន្លែងកើតហេតុបានឲ្យដឹងថា មុនពេលកើតហេតុ គេឃើញបុរសចំណាស់ម្នាក់ឈ្មោះ ហេង ហម អាយុ៧៣ឆ្នាំ ជាកសិកររស់នៅភូមិ-ឃុំខាងលើ បានជះកង់ត្រឡប់ពីផ្សារសាលក្រៅ ទៅផ្ទះ។ លុះជិះដល់ចំណុចកើតហេតុ ស្រាប់តែមានម៉ូតូមួយគ្រឿង បើកបរដោយបុរសឈ្មោះ ចក ប្រុស អាយុ២៥ឆ្នាំ ជាកសិករ រស់នៅភូមិ-ឃុំកើតហេតុ ត្រូវសត្វល្អិតចូលភ្នែក បណ្ដាលឲ្យស្រវាំង ក៏ជ្រុលចង្កូតទៅបុកកង់បុរសចំណាស់បណ្ដាលឲ្យដួលទាំងកង់និងម៉ូតូ ធ្វើឲ្យបុរសចំណាស់របួសបាក់ដៃជើង និងបែកក្បាល។ ចំណែកបុរសអ្នកបើកបរម៉ូតូគ្រាន់តែរលាត់ដៃជើង។
ក្រោយកើតហេតុ ភាគីទាំង២បានសម្របសម្រួលគ្នាបញ្ចប់រឿង នៅនឹងកន្លែងកើតហេតុ៕
ដោយ៖ ស សារ៉េត
