ខេត្តបាត់ដំបង៖ មន្ត្រីជំនាញមន្ទីរសុខាភិបាលខេត្តបាត់ដំបងកំពុងតែបើកការស្រាវជ្រាវស៊ើបអង្កេតជុំវិញបញ្ហាប្រជាពលរដ្ឋ៩នាក់បានរងការពុលស្ពៃជ្រក់ ។ ប្រជាពលរដ្ឋប្រុសស្រីក្មេងចាស់៩នាក់ រស់នៅក្នុងភូមិក្រឡាពាស ឃុំបាយដំរាំ ស្រុកបាណន់ ខេត្តបាត់ដំបង បានរងការពុលស្ពៃជ្រក់ នាំពីប្រទេសថៃដែលគេដឹកតាមកង់លក់ក្នុងភូមិក្រោយពីទទួលទានបណ្តាលឱ្យរងការរាគរុះក្អួតចង្អោរ ហើយត្រូវបានគេដឹងយកទៅសង្គ្រោះនៅមន្ទីរពេទ្យ បង្អែកខេត្តបាត់ដំបងកាលពីរសៀលថ្ងៃទី៣ ខែធ្នូ ឆ្នាំ២០១៥។
ជុំវិញបញ្ហានេះ បើតាមប្រភពពព័ត៌មានពីលោកមេឃុំបាយដំរាំ ប្រាប់ឱ្យដឹងថា ស្ពៃជ្រក់ ដែលរងការពុលនោះត្រូវបានគេនាំចូលពីប្រទេសថៃហើយគេយកដាក់លក់ក្នុងផ្សារបន្ទាប់មកមានអ្នកទិញបន្តពីផ្សារដឹកតាមកង់លក់នៅតាមណ្តាភូមិនានា ។
លោកមេឃុំបានប្រាប់ឱ្យដឹងទៀតថា កន្លងមកប្រជាពលរដ្ឋក៏ធ្លាប់ទិញស្ពៃជ្រក់ដឹកតាមកង់យកមកទទួលទាននោះដែរ ក៏ប៉ុន្តែមិនមានបញ្ហាអ្វីនោះទេ ទើបកាលពីរសៀលថ្ងៃម្សិលមិញប្រជាពលរដ្ឋទិញយកទៅទទួលទានបន្តស្រាប់តែកើតមានការពុលបែបនោះតែម្តង ។
លោកបានបញ្ជាក់ឱ្យដឹងទៀតថា ស្ពៃជ្រក់នាំចូលព្រីទេសថៃមានពណ៌សំបុរសជាងស្ពៃជ្រក់នៅក្នុងស្រុកខ្មែរ ។ប្រជាពលរដ្ឋចូលចិត្តនាំគ្នាទិញទទួលទានដោយគេមិនដឹងថាស្ពៃជ្រក់នាំចូលពីប្រទេសថៃគេលាយដាក់អ្វីនោះទេ ។ចំណែកស្ពៃជ្រក់ធ្វើនៅក្នុងស្រុកខ្មែរពណ៌មិនល្អប្រជាជនមិនចូលចិត្តទិញទទួលទាននោះឡើយ។អ្នករងការពុលស្ពៃជ្រក់មានមនុស្សចាស់២នាក់ វ័យកណ្តាលនិងជំទង់៣នាក់និងក្មេង៤នាក់។
ជុំវិញនៃបញ្ហានេះ បើតាមប្រភពព័ត៌មានពីគ្រូពេទ្យប្រចាំមណ្ឌលសុខភាពស្រុកបាណន់ប្រាប់ឱ្យដឹងថា ប្រជាពលរដ្ឋ៩នាក់រងការពុលស្ពៃជ្រក់មានម្នាក់ធូស្បើយចេញពីមន្ទីរពេទ្យរួចហើយចំណែក៨នាក់ទៀតកំពុងស្ថិតនៅព្យាបាលក្នុងមន្ទីរពេទ្យនៅឡើយនោះទេ ក៏ប៉ុន្តែអាការៈមានការធូស្បើយបន្តិចនោះហើយ។
លោកប្រាប់ឱ្យដឹងទៀតថា ពាក់ព័ន្ធនិងបញ្ហាខាងលើគេមិនទាន់ដឹងច្បាស់នៅឡើយនោះទេ គឺនៅរសៀលថ្ងៃទី៤ ខែធ្នូ ឆ្នាំ ២០១៥ មន្ត្រីជំនាញមកពីមន្ទីរសុខាភិបាលខេត្តសហការនិងគ្រូពេទ្យបង្អែកស្រុកបាណន់និងចុះទៅកន្លែងកើតហេតុដើម្បីបើកការស្រាវជ្រាវស៊ើបអង្កេតរកមូលហេតុពិតប្រាកដនៃការពុលនោះ ៕
ដោយ៖ សំ វិច្ឆិកា
