ភ្នំពេញ៖ ទីតាំងលក់គ្រឿងបន្លាស់ម៉ូតូនៅម្ដុំឃ្លាំងម៉ូតូស្ថិតក្នុងសង្កាត់ទឹកល្អក់ទី៣ ខណ្ឌទួលគោកដែលពាក់ព័ន្ធនឹងករណីចោរកម្ម ត្រូវកម្លាំង កងរាជអាវុធហត្ថរាជធានីភ្នំពេញនៃការិយាល័យស្រាវជ្រាវបទល្មើសព្រហ្មទណ្ឌសហការជាមួយ កម្លាំងកងរាជអាវុធហត្ថ ខណ្ឌទួលគោក ចុះឆែកឆេរត្រួតពិនិត្យកន្លែងលក់គ្រឿងបន្លាស់ម៉ូតូជាលិទ្ធផលដកហូតវត្ថុតាងនិង ឃាត់ខ្លួនម្ចាស់តូប ០២ កន្លែងផងដែរ ។
ករណីចុះបង្ក្រាបខាងលើនេះធ្វើឡើងកាលពីវេលាម៉ោង០៣និង៤០នាទីរសៀលថ្ងៃទី០៤ ខែធ្នូ ឆ្នាំ២០១៥ នៅចំនុច តូបជួល ផ្លូវ២៤៧ សង្កាត់ទឹកល្អក់៣ ខណ្ឌទួលគោក ។
តាមប្រភពព័ត៌មានពីមន្ត្រីកងរាជអាវុធហត្ថខណ្ឌទួលគោក បានឲ្យដឹងថា ម្ចាស់តូបដែលឃាត់ខ្លួនយកមកសួរនាំនោះទី១ ឈ្មោះ ម៉ឺន ដាវី អាយុ២៥ឆ្នាំ ភេទស្រី មុខរបរ លក់គ្រឿងម៉ូតូ ស្នាក់នៅផ្ទះជួលម្តុំផ្សារឃ្លាំងរំសេវ សង្កាត់ទឹកល្អក់៣ ខណ្ឌទួលគោក ;ទី២ ឈ្មោះ ញឹក គឹមឡេ ភេទប្រុស អាយុ៣០ឆ្នាំ ស្នាក់ នៅផ្ទះជួលម្តុំផ្សារឃ្លាំងរំសេវ សង្កាត់ទឹកល្អក់៣ ខណ្ឌទួលគោក (អ្នកទាំងពីរជាប្តីប្រពន្ធ)។
ចំណែកឯវត្ថុតាងដែលកម្លាំងកងរាជអាវុធហត្ថ ដកហូតយករួមមាន៖ បូមមុខ ៣០, បូមក្រោយ១០, បេនម៉ូតូ២១, កាបាំង០៧, កុងទ័រម៉ូតូ៣០, ក្បាលមុខ០២, អាវម៉ូតូ០២ និងស៊ីម៉ាំង០៨ ។
ក្រោយកើតហេតុម្ចាស់តូប២នាក់និង សម្ភារៈគ្រឿងម៉ូតូដែលដកហូតនោះត្រូវបានបញ្ជូនទៅការិយាល័យ ស្រាវជ្រាវបទល្មើសព្រហ្មទណ្ឌ កងរាជអាវុធហត្ថក្រុង ដើម្បីចាត់ការតាមនីតិវិធី ៕
ដោយ៖ ស ដារ៉ា
