ខេត្តកណ្តាល: យុវជនម្នាក់បានលង់ទឹកស្លាប់ នៅចំណុច បឹងធំ ក្នុងភូមិតារាបដូនស ឃុំ គគីរ ស្រុកកៀនស្វាយ ខេត្តកណ្តាល កាលពីវេលាម៉ោង១០និង១០នាទីព្រឹក ថ្ងៃសុក្រ ៥ រោច ខែបុស្ស ឆ្នាំ ច សំរឹទ្ធិស័ក ព.ស.២៥៦២ ត្រូវនឹង ថ្ងៃទី២៥ ខែមករា ឆ្នាំ២០១៩ ខណៈជិះទូករកខ្យងនៅបឹងធំមួយ ហើយរអឹលជើងធ្លាក់ពីលើទូកចូលទឹកជ្រៅ។
មន្ត្រីនគរបាលស្រុកកៀនស្វាយបានឲ្យដឹងថា ជនរងគ្រោះឈ្មោះ ស ច័ន្ទណារិទ្ធហៅ(ឈីង) ភេទប្រុស អាយុ១៨ឆ្នាំ មានទីលំនៅភូមិតារាបដូនស ឃុំ គគីរ ស្រុកកៀនស្វាយ ខេត្ត កណ្តាល។
ប្រភពដដែលបានឲ្យដឹងទៀតថា នៅថ្ងៃខែឆ្នាំវេលាម៉ោងកើតហេតុខាងលើ ឈ្មោះ ស ច័ន្ទណារិទ្ធ (ឈីង) បានបបួលបងប្អូនជីដូនមួយម្នាក់ ទៅរកខ្យងនៅក្នុងបឹងធំខាងក្រោយភូមិ។លុះពេលកំពុងអុំទូករកខ្យង មិនបានប្រយ័ត្នក៏រអឹលជើងធ្លាក់ចូលក្នុងទឹកបឹង និងបានស្រវាតោងទូកវិញ តែរៀបនឹងឡើងទូករួចទៅហើយ ស្រាប់តែទូកលិចដោយជនរងគ្រោះមិនចេះហែលទឹកក៏បានលង់ទឹកស្លាប់តែម្តង។ ឯបងប្អូនជីដូនមួយចេះហែលទឹក បានហែលបណ្តែតខ្លួនមកលើគោក ស្រែកហៅញាតិមិត្តឲ្យជួយ។ បន្ទាប់មកសាច់ញាតិបានទៅដល់ឃើញជនរងគ្រោះស្លាប់បាត់ទៅហើយក៏ស្រង់ជនរងគ្រោះយកមកផ្ទះ និងបានរាយការណ៍ជូនសមត្ថកិច្ចប៉ុស្តិ៍នគរបាលរដ្ឋបាលគគីរ ។
ក្រោយទទួលបានព័ត៌មានកម្លាំងប៉ុស្តិ៍ សហការជាមួយកម្លាំងជំនាញ អាជ្ញាធរ មូលដ្ឋាននិងគ្រូពេទ្យចុះពិនិត្យសាកសពនិងបានបញ្ជាក់ថាជនរងគ្រោះពុំមានស្លាកស្នាមអ្វីគួរឲ្យកត់សម្គាល់ឡើយគឺជនរងគ្រោះស្លាប់ដោយសារលង់ទឹក រួចបានប្រគល់សពឲ្យក្រុមគ្រួសារយកទៅធ្វើបុណ្យតាមប្រពៃណី៕
