ខេត្តកណ្តាល៖ មេក្លោងជួញដូរគ្រឿងញៀនម្នាក់ ត្រូវបានសមត្ថកិច្ចនគរបាលស្រុកស្អាងចាប់ខ្លួនកាលពីវេលាម៉ោង១០ និង១០នាទី ថ្ងៃទី០៦ ខែធ្នូ ឆ្នាំ២០១៥ នៅសិត្បូ ឃុំសិត្បូ ស្រុកស្អាងដើម្បីចាត់ការតាមនីតិវិធីច្បាប់ ។
អធិការនគរបាលស្រុកស្អាងលោកវរសេនីយ៍ទោ សេង សុជាតិ បានឲ្យដឹងថា ប្រតិបត្តិការចាប់ខ្លួនមេក្លោងជួញដូរគ្រឿងញៀនខាងលើនេះធ្វើឡើង ដោយអនុវត្តតាមដីកាបង្គាប់ឲ្យចាប់ខ្លួនលេខ៥២៥ ចុះថ្ងៃទី២១ ខែកក្តដា ឆ្នាំ២០១៥ របស់លោក គឹម ម៉េង ចៅក្រមស៊ើបសួរនៃសាលាដំបូងខេត្តកណ្តាលចោទប្រកាន់ពីបទ “ជួញដូរនូវសារធាតុញៀនដោយខុសច្បាប់” ដែលបានប្រព្រឹត្តកាលពីថ្ងៃទី២៧ ខែឧសភា ឆ្នាំ២០១៥ នៅភូមិសិត្បូ ឃុំសិត្បូ ស្រុកស្អាង ខេត្តកណ្តាល ។
លោកវរសេនីយ៍ទោ សេង សុជាតិ បានបន្តថា ជនត្រូវចោទខាងលើនេះមានណាំ សាត ហៅប៊ី ភេទប្រុស អាយុ២២ឆ្នាំ ជនជតិខ្មែរ មុខរបរមិនពិតប្រាកដ បច្ចុប្បន្នស្នាក់នៅក្នុងភូមិសិត្បូ ឃុំសិត្បូ ស្រុកស្អាង ។
លោកអធិការបានបញ្ជាក់ថា លោក គឹម ម៉េង ចៅក្រមស៊ើបសួរនៃសាលាដំបូងខេត្តបានបញ្ជាក់នៅក្នុងដីកាថា បទ “ជួញដូរដោយខុសច្បាប់នូវសារធាតុញៀន” គឺជាបទល្មើសព្រហ្មទណ្ឌដែលមានចែង និងឲ្យផ្តន្ទាទោសតាមបញ្ញាត្តិមាត្រា៤០ នៃច្បាប់ស្តីពីការត្រួតពិនិត្យគ្រឿងញៀន ។ យោងតាមច្បាប់ស្តីពីការត្រួតពិនិត្យគ្រឿងញៀន ត្រង់មាត្រា៤០បានចែងថា ការក្សាទុក ដឹកជញ្ជូន ឫជួញដូរដោយខុសច្បាប់នូវសារធាតុញៀនដែលស្ថិតនៅក្នុងតារាងទី១ និងទី២ ត្រូវផ្តន្ទាទោសដាក់ពន្ធនាគារពី២ឆ្នាំទៅ៥ឆ្នាំ ។ ក្រៅពីទោសដាក់ពន្ធនាគារ ជនល្មើសនឹងអាចត្រូវទទួលបន្ថែមនូវទោសពិន័យជាប្រាក់ ពី៤លានរៀលទៅដល់១០លានរៀល ៕
ដោយ៖ ស្អាងជ័យ
