ខេត្តកំពង់ចាម៖ ស្ដ្រីម្នាក់ត្រូវបានកម្លាំងនគរបាលខេត្តកំពង់ចាម សហការជាមួយកម្លាំងស្នងការនគរបាលខេត្ត ឃាត់ខ្លួនបាន បន្ទាប់ពីរូបនាងបានចាប់ក្មួយស្រីជីដូនមួយ ដើម្បីជំរិតទារប្រាក់ពីឪពុកកុមារីរងគ្រោះចំនួន៥០០ដុល្លារ។
ការឃាត់ខ្លួនស្ដ្រីខាងលើបានធ្វើឡើងកាលពីវេលាម៉ោង៣រសៀល ខែធ្នូ ឆ្នាំ២០១៥ នៅក្នុងភូមិសាស្ដ្រឃុំស្រងែ ស្រុកព្រៃឈរ ខេត្តកំពង់ចាម។
លោកសេង ហ៊ន អធិការស្រុកព្រៃឈរបានឲ្យដឹងថា ស្ដ្រីដែលត្រូវឃាត់ខ្លួនខាងលើឈ្មោះ វ៉ន សារី អាយុ២៤ឆ្នាំ រស់នៅក្នុងភូមិកំពង់ក្ដី ឃុំកំពង់រាប ស្រុកកោះសូទិន ខេត្តកំពង់ចាម។
ដោយឡែកឧត្តមសេនីយ៍ទោ បែន រ័ត្ន ស្នងការនគរបាលខេត្តឲ្យដឹងថា ការតាមឃាត់ខ្លួនស្ដ្រីជនសង្ស័យខាងលើនេះ គឺបន្ទាប់ពីទទួលបានពាក្យបណ្ដឹងពីបុរសឈ្មោះ ឆែម សារ៉ូ អាយុ៣៥ឆ្នាំ ជាកសិករ រស់នៅភូមិទួលទ្រាខាងត្បូង ឃុំជាប់ ស្រុកត្បូងឃ្មុំ ខេត្តត្បូងឃ្មុំត្រូវជាឪពុករបស់កុមារីរងគ្រោះ ដែលបានឲ្យដឹងថា មានមនុស្ស២នាក់បានចាប់ក្មេងស្រីរបស់គាត់ឈ្មោះ សារ៉ូ លីហ្សា អាយុ៩ឆ្នាំ ក្នុងបំណងដើម្បីជំរិតទារប្រាក់ពីគាត់ចំនួន៥០០ដុល្លារ និងបានយកម៉ូតូរបស់គាត់មួយគ្រឿងម៉ាកហុងដាឌ្រីម ពណ៌ខ្មៅ ស៊េរីឆ្នាំ២០១២។
បុរសឈ្មោះឆែម សារ៉ូ បានឲ្យដឹងថា នៅថ្ងៃទី៤ ខែធ្នូ ដែលក្រុមជនសង្ស័យបានចាប់កូនស្រីគាត់ទៅ គឺស្ដ្រីឈ្មោះ វ៉ន សាវី បានទៅចូលរួមពិធីមង្គលការគេ នៅឃុំព្រះធាតុ ស្រុកអូររាំងឪ ហើយក៏បានហួសមកចូលេងផ្ទះគាត់។ ពេលមកដល់ផ្ទះគាត់ ស្ដ្រីនោះក៏បានខ្ចីម៉ូតូរបស់គាត់ ថាយកទៅទិញបង្អែមហូប ហើយក៏បានយកកូនស្រីរបស់គាត់ទៅជាមួយផង។ នោះក្រោយពេលទៅបាត់រហូតដល់ពេលយប់ នៅតែមិនទាន់ឃើញនាងត្រឡប់មកវិញទៀត ដែលធ្វើឲ្យគាត់មានក្ដីបារម្ភយ៉ាងខ្លាំង។ លុះរហូតដល់ព្រឹកថ្ងៃទី៥ ខែធ្នូ ស្ដ្រីឈ្មោះវ៉ន សាវី (ជនសង្ស័យ) ក៏បានទាក់ទងមកគាត់ថា បើចង់បានកូនស្រីវិញ ទាល់តែផ្ញើប្រាក់៥០០ដុល្លារតាមវីងទៅឲ្យគេ បើពុំនោះទេ គេនឹយយកកូនស្រីរបស់គាត់ទៅលក់។ ដោយខ្លាចកូនស្រីមានគ្រោះថ្នាក់ គាត់ក៏បានយល់ព្រមធ្វើតាមនាង ប៉ុន្ដែផ្ញើលុយទៅ៥០ដុល្លារសិន ហើយសន្យាថានិងវេរទៅបន្ដបន្ទាប់ទៀត។ បន្ទាប់មកគាត់ក៏បានទៅដាក់ពាក្យបណ្ដឹងនៅស្នងការដ្ឋាននគរបាលខេត្ត ដើម្បីឲ្យជួយតាមចាប់ខ្លួនជនសង្ស័យ និងជួយរំដោះកូនស្រីគាត់មកវិញ។
បន្ទាប់ពីទទួលបានពាក្យបណ្ដឹងពីឪពុកក្មេងស្រីរងគ្រោះ លោកឧត្តមសេនីយ៍ទោបែន រ័ត្ន បានចាត់ពង្រាយកម្លាំងនៅគ្រប់បណ្ដាអធិការដ្ឋានស្រុក-ក្រុង ឲ្យតាមចាប់ជនសង្ស័យ។ លុះមកដល់រសៀលថ្ងៃទី៥ ខែធ្នូ កម្លាំងក៏បានប្រទះឃើញជនសង្ស័យកំពុងតែជិះម៉ូតូឌុបក្មេងស្រីរងគ្រោះ ក្នុងទិសដៅចេញពីស្រុកជើងព្រៃមកកាន់ទឹកដីស្រុកព្រៃឈរ ក៏ឃាត់ខ្លួនជនសង្ស័យ និងរំដោះក្មេងស្រីរងគ្រោះ បានមកវិញដោយសុវត្ថិភាព។
បច្ចុប្បន្នក្មេងស្រីរងគ្រោះ ត្រូវបានរំដោះមកវិញ និងប្រគល់ឲ្យក្រុមគ្រួសារដោយសុវត្ថិភាព។ ចំណែកស្ដ្រីជាជនសង្ស័យ ត្រូវបានកសាងសំណុំរឿង បញ្ជូនខ្លួនទៅកាន់តុលាការ ដើម្បីចាត់ការតាមនីតិវិធី៕
ដោយ៖ វិបុល
