ខេត្ដបន្ទាយមានជ័យ៖ ថ្វីត្បិតតែវិធាន ការទប់ស្កាត់ពលករចំណាកស្រុកតាម ច្រករបៀងនៃខេត្ដជាប់ព្រំដែនថៃត្រូវ បានគេមើលឃើញថាមានការរឹតបន្ដឹង ព្រោះខ្លាចពលករជួបបញ្ហាជាយថាហេតុលើទឹកដីថៃក្ដីក៏ប៉ុន្ដែច្រករបៀងមួយ ចំនួននៅតែបន្ដបើកដៃឱ្យពលករឆ្លងទៅមកដីថៃយ៉ាងអនាធិបតេយ្យដដែល ។
ជាក់ស្ដែងច្រករបៀងចំនួន២ គឺស្រុក ម៉ាឡៃខេត្ដបន្ទាយមានជ័យ និងស្រុក សំពៅលូនខេត្ដបាត់ដំបងគេឃើញក្រុមពលករចំណាកស្រុកបានសម្រុកទៅមកដីថៃគ្មានអាជ្ញាធរសមត្ថកិច្ចទប់ស្កាត់ ឡើយ ។ ពលករមួយក្រុមមានចាស់ មានក្មេងបានសម្រុកឆ្លងដែនតាមច្រក របៀងមួយក្នុងស្រុកម៉ាឡៃដែលនៅទីនោះគេមិនឃើញមានសមត្ថកិច្ចទេសង្ស័យ ក្រុមពលករលួចឆ្លងដែនតាមរយៈមេ ខ្យល់ ។ ចំណែកច្រករបៀងជាច្រើនក្នុង ភូមិពោធិ៍ជ្រៃឃុំសិរីមានជ័យស្រុកសំពៅលូនខេត្ដបាត់ដំបងដែលភូមិសាស្ដ្រនោះគ្រប់គ្រងដោយយោធាសឹករងស្រុក សំពៅលូនប៉ុស្ដិ៍អង់តែនឬប៉ុស្ដិ៍៦៣និង នគរបាលការពារព្រំដែន៨១៧ប៉ុស្ដិ៍គីឡូ ម៉ែត្រលេខ១៣គេឃើញមានពលករឆ្លងទៅមកដីថៃយ៉ាងសេរីសង្ស័យសមត្ថ កិច្ចជាប់ពាក់ព័ន្ធនឹងលាភសក្ការព្រោះ មិនបានទប់ស្កាត់ឡើយ ។
រថយន្ដកាមរីនិងរថយន្ដនីសាន់ក៏ដូចជាប្រភេទទួរីស១២កៅអីដឹកជញ្ជូនពលករពីតាមបណ្ដាខេត្ដទៅឱ្យឆ្លងដែនក្នុង ស្រុកសំពៅលូនដោយគ្មានសមត្ថកិច្ច ទប់ស្កាត់ឡើយក្នុងមួយថ្ងៃៗជាច្រើនរថយន្ដ ។ ខណៈអ្នកយកព័ត៌មានផ្ដិតយក រូបភាពពលករឆ្លងកាត់មុខច្រករបៀង ប៉ុស្ដិ៍យោធានិងនគរបាលការពារព្រំដែនខាងលើក្រុមយោធានៅទីនោះបានចាប់កាមេរ៉ាអ្នកយកព័ត៌មានលុបរូបភាព សំខាន់ពាក់ព័ន្ធនឹងពលករឆ្លងដែនកាត់មុខប៉ុស្ដិ៍អស់តែម្ដងពោលគឺបន្សល់នៅ តែរូបមួយចំនួនតែប៉ុណ្ណោះ ។
ប្រភពពីបន្ទាត់ព្រំដែនក្នុងស្រុកសំពៅលូនប្រាប់ថាច្រករបៀងមួយចំនួនពេល ថ្ងៃគេឱ្យពលករឆ្លងដែនទៅមកខុសច្បាប់ឯពេលយប់គេរកស៊ីចម្លងទំនិញគេចពន្ធឬមាន់ទានាំចូលពីប្រទេសថៃ ៕
ដោយ៖ ហេង នរិន្ទ្រ
