ខេត្តពោធិ៍សាត់៖ រថយន្ដពាក់ស្លាកលេខខ.ម មួយគ្រឿង រួមនឹងមនុស្ស២នាក់ ត្រូវបានរដ្ឋបាលព្រៃឈើស្រុកក្រគរ ឃាត់បានកាលពីវេលាម៉ោង៦ព្រឹក ថ្ងៃទី៨ ខែធ្នូ ឆ្នាំ២០១៥ ។
រថយន្ដដែលត្រូវបានឃាត់នេះម៉ាកDong Teng ពណ៌ត្រេអ៊ី ពាក់ស្លាកលេខខេមរភូមិន្ទ ៣.៤៧៧៦ បានដឹកឈើប្រភេទធ្នង់ ចំនួនប្រហែល៥គីប ដែលដឹកចេញពីស្រុកក្រវ៉ាញ។ ចំណែកមនុស្ស២នាក់ដែលត្រូវឃាត់ខ្លួន ទី១ឈ្មោះ អាន រ៉ែម ភេទប្រុស អាយុ២៥ឆ្នាំ ជាមន្ដ្រីយោធា នៅកងពលតូចដឹកជញ្ជូនលេខ៩៩ និងទី២ឈ្មោះ អ៊ុល សុធា ភេទប្រុស អាយុ៤៥ឆ្នាំ ជាមន្ដ្រីយោធានៅអង្គភាពជាមួយគ្នា។
ក្រោយពីឃាត់ខ្លួនបានរថយន្ដ និងមនុស្សទាំង២នាក់ បច្ចុប្បន្នផ្នែករដ្ឋបាលព្រៃឈើស្រុកក្រគរ បានបញ្ជូនទៅកាន់អធិការដ្ឋាននគរបាលស្រុក ដើម្បីកសាងសំណុំរឿងចាត់ការបន្ដតាមនីតិវិធី៕
ដោយ៖ ប៉ឹម ពិន
