ភ្នំពេញ៖ រថយន្តស្ទូចដឹកគ្រឿងចក្រមួយគ្រឿងបេីកបោះពួយយ៉ាងល្បឿនទៅកៀរពីមុខរថយន្តឡុចស៉ីសស៊េរីទំនើបមួយទៀតដែលបេីកបត់ឆ្លងផ្លូវដោយខ្វះការប្រុងប្រយ័ត្ន កាលពីវេលាម៉ោង៩យប់ ថ្ងៃទី០៥ ខែមិនា ឆ្នាំ២០១៩ត្រង់ចំណុចខាងលិចកងរាជអាវុធហត្ថរាជធានីភ្នំពេញ តាមបណ្ដោយផ្លូវវេងស្រេងកែងនិងផ្លូវ៣៧១សុលា ស្ថិតក្នុងសង្កាត់ស្ទឹងមានជ័យទី៣ ខណ្ឌមានជ័យ។
តាមប្រភពព័ត៌មានពីកន្លែងកើតហេតុបានឲ្យដឹងថានៅមុនពេលកើតហេតុគេឃេីញស្ត្រីម្នាក់បេីកបររថយន្តស៊េរីទំនើបមួយគ្រឿងម៉ាក ឡុចស៉ីសNX200t ពណ៌កណ្តុរប្រមេះ ពាក់ស្លាកលេខ ភ្នំពេញ2BB-8827។ ដោយធ្វើដំណើរតាមបណ្តោយផ្លូវ៣៧១សុលា ក្នុងទិសដៅពីជេីងទៅត្បូង លុះមកដល់ចំណុចកើតហេតុរថយន្តខាងលើ ក៏បានបេីកឆ្លងផ្លូវវេងស្រេងបំណងបត់ទៅកេីតឆ្ពោះទៅច្រមុះជ្រូកស្ទឹងមានជ័យដោយខ្វះការប្រុងប្រយ័ត្ន។ ហេីយខណៈពេលដែលបត់មិនទាន់និងផុតផងក៏ស្រាប់តែមានរថយន្តស្ទូចដឹកគ្រឿងចក្រមួយគ្រឿងទៀតម៉ាក ហីយិនដាយ ពណ៌ខៀវ ពាក់ស្លាកលេខ ភ្នំពេញ3A-0831។
ដែលបេីកបរដោយបុរសម្នាក់ តាមបណ្តោយផ្លូវវេងស្រេង ក្នុងទិសដៅពីលិចទៅកេីត និងក្នុងល្បឿនយ៉ាងលឿន។ ហេីយបានព្យាយាមបើកគេចពីរថយន្តខាងលេីទៅខាងស្តាំ តែគេចមិនផុតក៏ជ្រុលទៅកៀររថយន្ដស៊េរីទំនើបខាងលើចំខាងមុខចំហៀងខាងស្តាំពេញទំហឹងបណ្តាលឲ្យរងការខូចខាតយ៉ាងដំណំ ចំណែកឯរថយន្តស្ទូចរងការខូចខាតវៀចកាងនិងបែកកង់ខាងក្រោយចំហៀងខាងឆ្វេង ប៉ុន្តែមិនបង្កឲ្យមាននរណាម្នាក់រងរបួសនោះទេ។
ក្រោយពេលកេីតហេតុសមត្ថកិច្ចមូលដ្ឋានក៏បានចុះមកដល់កន្លែងកើតហេតុ ហេីយក៏បានឲ្យភាគីទាំងសងខាងធ្វេីការសម្របសម្រួលដោះស្រាយគ្នាបន្ទាប់មកក៏មានតំណាងភាគីរថយន្តទាំងពីរបានចូលមកធ្វេីការដោះស្រាយគ្នា រួចដោយភាគីខាងរថយន្តស្ទូចមិនចង់មានរឿងរ៉ាវវែងឆ្ងាយក៏ព្រមចេញសំណងចំនួន១៥០០ដុល្លារឲ្យទៅភាគីខាងរថយន្តឡុចស៉ីសដេីម្បីបញ្ចប់រឿងនៅនិងកន្លែងកើតហេតុ៕ដោយ៖ ភារ៉ា ដង្កោ
