ភ្នំពេញ៖ យុវជនពីរនាក់ស្រវឹងស្រា បានជិះម៉ូតូលឿនជ្រុលទៅបុករថយន្តស៊េរីទំនើបRoll Royce របស់លោកឧកញ៉ា(ឌួង ឆាយ)បណ្ដាលឲ្យរងការខូចខាតតិចតួច ចំណែកឯអ្នកបើកបរម៉ូតូនិងអ្នករួមដំណើររងរបួសបែកមាត់បែកមាត់។
ហេតុការណ៍នេះបានបង្កឲ្យមានការភ្ញាក់ផ្អើលឡើងនៅវេលាម៉ោងជាង១០យប់ ថ្ងៃទី០៥ ខែមិនា ឆ្នាំ២០១៩ តាមបណ្ដោយមហាវិថីព្រះនរោត្តម សង្កាត់បឹងកេងកង១ ខណ្ឌចំការមន រាជធានីភ្នំពេញ។
ប្រភពព័ត៌មានពីកន្លែងកើតហេតុបានប្រាប់ឲ្យដឹងថា មុនពេលកើតហេតុគេឃើញយុវជនពីរនាក់ស្រវឹងស្រាបានបេីកម៉ូតូមួយគ្រឿងម៉ាក HONDA DREAM ពណ៌ខ្មៅពាក់ស្លាកលេខភ្នំពេញ1FI-1094ក្នុងល្បឿនលឿនលុះមកដល់ចំណុចកើតហេតុស្រាប់តែម៉ូតូចាប់ហ្វ្រាំងមិនទាន់ក៏ជ្រុលទៅបុកចំរថយន្តស៊េរីទំនើបម៉ាក Roll Royce ពណ៌ស ដែលជារថយន្តរបស់លោកឧកញ៉ា( ឌួង ឆាយ ) បណ្ដាលឲ្យរងការខូចខាតតិចតួច ។ ចំណែកឯអ្នកបេីកម៉ូតូនិងអ្នករួមដំណេីររងរបួសបែកមុខបែកមាត់តែប៉ុណ្ណោះ។
មួយសន្ទុះក្រោយមកលោកឧកញ៉ា(ឌួង ឆាយ)ក៏បានបើកបរចាកចេញពីកន្លែងកើតហេតុ ដោយបានប្រាប់ឲ្យខាងមន្រ្ដីជំនាញធ្វើការដោះស្រាយចំពោះរឿងមួយនេះ។ ហើយចំពោះករណីគ្រោះថ្នាក់ចរាចរណ៍នេះ គេឃើញគេហទំព័រហ្វេសប៊ុករបស់លោកឧកញ៉ា(ឌួង ឆាយ)បានបង្ហោះសារដោយសរសេរថា” ខ្ញុំពិតជាមានអារម្មណ៍សោកស្តាយ និងឈឺចាប់បំផុតពេលដែលគេបុកឡានខ្ញុំហើយមិនដឹងកំហុសខ្លួនឯង ខ្ញុំនឹងមិនលើកលែងទោសអោយមនុស្សដែលមិនស្គាល់ពីកំហុសរបស់ខ្លួនឯង និងមនុស្សត្រូវចាប់ផ្តើមរៀនទទួលលទ្ធផលនៃកំហុសរបស់ខ្លួនឯងជាពិសេសម៉ូតូបើកបរមិនគោរពច្បាប់ចរាចរណ៍ និងស្មារតីក្រោមជាស្រវឹង។ មាសប្រាក់មិនសំខាន់ សំខាន់ឡានខ្ញុំគេឈប់ផលិត និងខ្ញុំមានបំណងទុកជាកេរ្តិ៍ប្រចាំត្រកូលរហូត” ។
ក្រោយកេីតហេតុសមត្ថកិច្ចជំនាញបានធ្វើការឃាត់ខ្លួនអ្នកបើកបរម៉ូតូនិងអ្នករួមដំណើរយកទៅអធិការខណ្ឌចំការមនដេីម្បីធ្វើការសាកសួរនាំបន្តផងដែរ៕ដោយ៖ ភារ៉ា ដង្កោ
