ភ្នំពេញ ៖ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា សម្តែងមោទនភាពចំពោះការរីកចម្រេីនវិស័យអប់រំនៅកម្ពុជា ដែលកម្ពុជាបានចាប់ផ្តើមឡើងពីចំណុចសូន្យ ក្រោយបានងើបពីសង្រ្គាមមក។
ប្រសាសន៍សម្តេចតេជោ ធ្វេីឡេីងនៅថ្ងៃទី២១ ខែមីនា ឆ្នាំ២០១៩ នេះ ក្នុងពិធីប្រគល់សញ្ញាបត្រជូននិស្សិតសាកលវិទ្យាល័យអាស៊ីអឺរ៉ុបចំនួន១,៥៧៨នាក់ ក្នុងនោះនារីមានចំនួន៦៤០នាក់ ដែលពិធីនេះនឹងធ្វើឡើងនៅវិទ្យាស្ថានជាតិអប់រំ។
សម្តេចតេជោ មានប្រសាសន៍ថា ក្នុងរយៈពេល៤០កន្លងមកនេះ យើងបានខិតខំប្រឹងប្រែងយ៉ាងខ្លាំងក្លាក្នុងការអភិវឌ្ឍប្រទេសជាតិ ដែលពីមុនកម្ពុជាត្រូវបានគេឃុំព័ទ្ធដោយសេដ្ឋកិច្ច តែយើងបានរើបម្រាស់រហូតសម្រេចបាននូវកំណើនសេដ្ឋកិច្ចជាមធ្យមក្នុងរង្វង់ ៧% ក្នុង១ឆ្នាំ ក្នុងរយៈពេលជាង២ទសវត្សចុងក្រោយនេះ។
តាមរយៈវិស័យអប់យើងបានចាប់ផ្តើមតាំងពីអ្នកចេះច្រើន បង្រៀនអ្នកចេះតិច និង អ្នកចេះតិចបង្រៀនអ្នកមិនចេះសោះ រហូតដល់ពេលនេះយើងមានគ្រូបង្រៀន និងអ្នកជំនាញច្បាស់លាស់ក្នុងការបណ្តុះបណ្តាលធនធានមនុស្សរបស់យើង ៕ ចេស្តា
