កាលពីថ្ងៃទី១១ ខែធ្នូ ឆ្នាំ២០១៥ មន្ត្រីជាន់ខ្ពស់មកពីកូរ៉េខាងជើង និងខាងត្បូងបានចាប់ផ្តើមជួបពិភាក្សាគ្នាដែលកម្រនឹងកើតមានឡើងមួយនៅក្នុងបរិវេណតំបន់ឧស្សាហកម្មកែស៊ុង ។ ការជួបពិភាក្សាគ្នានេះក្នុងគោលបំណងបន្ធូរបន្ថយស្ថានការណ៍តានតឹងនៅឧបទ្វីបកូរ៉េ ខណៈដែលប្រទេសទាំងពីរមិនទាន់មានសន្ធិសញ្ញាសនិ្តភាពពេញលេញនៅឡើយផងនោះ ។
មានការកត់សម្គាល់ឲ្យឃើញថា ការជួបពិភាក្សាគ្នារវាងប្រទេសទាំងពីរនៅពេលនេះគឺជាជំហានវិជ្ជមានមួយ ចាប់តាំងពីខែសីហា ឆ្នាំ២០១៥កន្លងមក បន្ទាប់ពីស្ថានការណ៍តាន់តឹងខ្លាំងឡើងបានកើតឡើងក្រោយពីមានការផ្ទុះគ្រាប់មីននៅតាមបន្ទាត់ព្រំដែនកូរ៉េខាងត្បូងបណ្តាលឲ្យកម្លាំងទាហានល្បាតកូរ៉េខាងត្បូងរងរបួស ។
លោក Hwang Boo-gi ឧបនាយករដ្ឋមន្ត្រីក្រសួងរួបរួមកូរ៉េខាងត្បូងបានថ្លែងថា យើងសង្ឃឹមថា បញ្ហាផ្សេងៗដែលកំពុងបន្តឲ្យមានការជជែកពិភាក្សាដោះស្រាយគ្នានោះ នឹងមានការពិគ្រោះយោបល់ពិភាក្សាគ្នាដោះស្រាយ ។ ប្រធានគណៈប្រតិភូពិភាក្សារបស់កូរ៉េខាងជើងគឺដឹកនាំដោយលោក Jong Jong-su ក៏បានអំពាវនាវឲ្យមានការកក់ក្តៅទុកចិត្តគ្នាទៅវិញទៅមករវាងកូរ៉េទាំងពីរផងដែរ ។
មិនត្រូវបានបញ្ជាក់បង្ហាញអំពីរបៀបវារៈនៃកិច្ចប្រជុំនៅពេលនេះឡើយ ប៉ុន្តែកូរ៉េខាងត្បូងបានបង្ហាញពីចេតនាចង់ឲ្យមានការជួបជុំគ្រួសារដែលបែកបាក់កាលសម័យសង្គ្រាមនោះកើតឡើងច្រើនដងជាបន្តទៀតទៅទៀត ។ ការជួបជុំគ្រួសារដែលបែកបាក់ក្នុងសម័យសង្គ្រាមរបស់ពលរដ្ឋកូរ៉េទាំងពីរនាពេលចុងក្រោយបំផុតគឺក្នុងខែតុលា ឆ្នាំ២០១៥កន្លងមកនេះ ។ ទោះបីយ៉ាងណា កូរ៉េខាងត្បូងចង់ឲ្យមានការជួបជុំគ្រួសារបែបនេះញឹកញាប់ថែមទៀត ខណៈដែលបញ្ជឺឈ្មោះដែលបានដាក់ឲ្យមានការទៅជួបជុំគ្រួសាររបស់កូរ៉េខាងត្បូងនោះមានរហូតជាង៦០.០០០នាក់ ។
រីឯកូរ៉េខាងជើងវិញ ត្រូវគេដឹងថា ទំនងជាលើកយកបញ្ហាមួយចំនួនដែលទាក់ទងបញ្ហាសេដ្ឋកិច្ចជាដើមមកជជែកពិភាក្សាជាមួយកូរ៉េខាងត្បូងនាពេលនេះ ។ កូរ៉េខាងជើងទំនងជាចរចាដើម្បីឲ្យមានការបន្តការធ្វើដំណើរកម្សាន្តពីកូរ៉េខាងត្បូងទៅកាន់រមណីយដ្ឋានកូរ៉េខាងជើង Mount Kumgang ។ ដំណើរកម្សាន្តទៅកាន់តំបន់រមណីយដ្ឋាន Mount Kumgang នេះត្រូវបានផ្អាកកាលពីឆ្នាំ២០០៨មកម្ល៉េះ បន្ទាប់ពីអ្នកទេសចរណ៍កូរ៉េខាងត្បូងម្នាក់ត្រូវបានសម្លាប់ដោយកម្លាំងទាហានកូរ៉េខាងជើង ។
ក្រុមអ្នកជំនាញនៅក្នុងទីក្រុងសេអ៊ូលបានបញ្ជាក់ថា គេលំបាកនៅក្នុងការស្មានទុកខ្លាំងណាស់ថា កូរ៉េខាងត្បូងអាចនឹងបន្តការពិភាក្សាទៅលើបញ្ហាបើកបន្តឲ្យមានដំណើរកម្សាន្តរបស់ពលរដ្ឋខ្លួនចូលទៅកាន់តំបន់រមណីយដ្ឋានខាងលើនេះ ដរាបណាមិនទាន់មានការសុំទោស ឬការពន្យល់ណាមួយឲ្យបានច្បាស់លាស់ពីកូរ៉េខាងជើងទាក់ទងបញ្ហាបាញ់សម្លាប់ភ្ញៀវទេសចរណ៍កូរ៉េខាងត្បូងជាមុនទេនោះ ។
មូលហេតុនេះហើយ ទើបក្រុមអ្នកជំនាញអំពីបញ្ហានេះបានបញ្ចេញទស្សនៈថា ការជួបពិភាក្សារវាងកូរ៉េទាំងពីរនៅសួនឧស្សាហកម្មកែស៊ុងនៅពេលនេះដែលធ្វើឡើងតាមការព្រមព្រៀងកាលពីខែសីហា ឆ្នាំ២០១៥កន្លងមកនោះ ទំនងជាមិនអាចសម្រេចចេញជាលទ្ធផលដុំកំភួនបាននោះឡើយ ។ ជាពិសេសបញ្ហាទាំងអស់នេះ ប្រទេសទាំងពីរបានជាប់គាំងពិភាក្សាគ្នារកច្រកចេញមិនរួចតាំងពីអតីតកាលមកម្ល៉េះ ។
ក្រុមអ្នកជំនាញបានបន្តលើកឡើងទៀតថា ជាមួយគ្នានេះដែរ កូរ៉េទាំងពីរទំនងជាមិនអាចសម្រេចបានលទ្ធផលផ្លែផ្កាទៅទៀតនោះគឺបញ្ហាពាក់ព័ន្ធមហិច្ឆតាអាវុធបរមាណូរបស់កូរ៉េខាងជើង និងស្ថានការណ៍សិទ្ធិមនុស្សរបស់ប្រទេសនេះ ។ កូរ៉េខាងជើងបានទទួលរងការដាក់ទណ្ឌកម្មតាំងពីឆ្នាំ២០១០មកម្ល៉េះ នៅបន្ទាប់ពីកូរ៉េខាងត្បូងបានអះអាងថា គ្រាប់បែកបុករបស់កម្លាំងទាហានកូរ៉េខាងជើងបានបាញ់ពន្លិចនាវាចម្បាំង របស់កម្លាំងទាហានជើងទឹកកូរ៉េខាងត្បូងបណ្តាលឲ្យលិច និងស្លាប់មនុស្ស៤៦នាក់នោះ ៕
ប្រែសម្រួល៖ ថាច់ យ៉ាត
