ភ្នំពេញ៖ ជនសង្ស័យម្នាក់ត្រូវបានកម្លាំងនគរបាលប៉ុស្តិ៍ព្រៃសរចាប់វាយខ្នោះក្រោយពេលឆែកឆេររកឃើញគ្រឿង​ញៀន១កញ្ចប់ធំដែលលាក់ទុកក្នុងហោប៉ាវខោបើកpassapp(រុឺម៉កកង់បីឥណ្ឌា)បំរុងយកទៅចែកចាយឱ្យម៉ូយ។

ជនសង្ស័យខាងលើនេះត្រូវបានកម្លាំងនគរបាលប៉ុស្តិ៍ព្រៃសរធ្វើការឃាត់ខ្លួននៅវេលាម៉ោង៨ និង៤០នាទីព្រឹកថ្ងៃទី២៥ ខែមីនា ឆ្នាំ២០១៩ ស្ថិតនៅផ្លូវបេតុងភូមិប្រការសង្កាត់ព្រៃសរ ខណ្ឌដង្កោ រាជធានីភ្នំពេញ ខណះពេលដែលសមត្ថកិច្ចកំពុងល្បាតពួនស្ទាក់បទល្មើសក្នុងមូលដ្ឋាន។

សមត្ថកិច្ចបានឲ្យដឹងថា ជនសង្ស័យខាងលើមានឈ្មោះកាន ម៉ារីន អាយុ៣០ឆ្នាំ មុខរបររត់រុឺម៉កកង់បីឥណ្ឌា(passapp) ស្នាក់នៅការដ្ឋានបុរីពិភពថ្មីចំការដូង ។

ក្រោយពេលឃាត់ខ្លួនជនសង្ស័យខាងលើ សមត្ថកិច្ចបានដកហូតថ្នាំញៀន១កញ្ចប់ធំ រុឺម៉កកង់បី១គ្រឿង ឋរសព្ទ័ដៃចំនួន៣គ្រឿង ខ្សែកនិងខ្សែដៃក្លែងក្លាយចំនួន២ខ្សែ ។

បន្ទាប់មកសមត្ថកិច្ចជំនាញក៏បាននាំខ្លួនជនសង្ស័យខាងលើទៅធ្វើការសាកសួបន្តនៅប៉ុស្តិ៍នគរបាលរដ្ឋបាលព្រៃសរ ។ នៅចំពោះមុខសមត្ថកិច្ចជនសង្ស័យខាងលើបានសារភាពថាថ្នាំញៀនខាងលើរូបគេបានទិញមកពីជនសង្ស័យម្នាក់ទៀតទុកយកមកចែកចាយឱ្យក្រុមជាងសំណង់ក្នុងការដ្ឋានបុរីពិភពថ្មី។

បច្ចុប្បន្នជនសង្ស័យរួមនិងវត្ថុតាងត្រូវបានបញ្ចូនទៅអធិការដ្ឋាននគរបាលខណ្ឌដង្កោដើម្បីកសាងសុំនុំរឿង បញ្ជូនទៅសាលាដំបូងរាជធានីភ្នំពេញចាត់ការតាមនីតិវិធី ៕ ដោយ៖ ភារ៉ា ដង្កោ