ភ្នំពេញ៖ មានប្រសាសន៍ពីរាជធានីភ្នំពេញ ក្នុងពិធីប្រគល់សញ្ញាបត្រដល់និស្សិត សាកលវិទ្យាល័យ ភ្នំពេញ អន្តរជាតិ (PPIU) នាព្រឹកថ្ងៃទី ២៥ ខែមីនា ឆ្នាំ២០១៩នេះ សម្តេចតេជោ ហ៊ុន សែន នាយករដ្ឋមន្ត្រីនៃ កម្ពុជា ផ្តាំផ្ញើទៅកាន់ លោកឧត្ដមសេនីយ៍ ត្រី សាន្ត ប៊ុនថាន មេបញ្ជាការកងរាជអាវុធហត្ថខេត្តក្រចេះ ប្រយ័ត្នអស់ស័ក្តិ និងត្រូវ បណ្ដេញចេញ ពីក្របខ័ណ្ឌព្រោះរឿងកូន ដកកាំភ្លើងភ្ជង់គំរាមគេ ។
សម្តេចតេជោ មានប្រសាសន៍ថា”មេប៉េអឹម ខេត្តក្រចេះ ត្រូវបញ្ចុះបញ្ចូលកូនឱ្យចូលខ្លួន តាមការកោះហៅរបស់ព្រះរាជអាជ្ញា ខេត្ត កំពង់ចាម វាអត់ទាន់មានរឿងអីទេ ។ ប៉ុន្តែបេី ស្រលាញ់កូនពេក អ្នកនឹងអស់ស័ក្តិ ខ្ញុំនឹងដក ស័ក្តិ បណ្តេញចោល”។
នាយករដ្ឋមន្ត្រី នៃកម្ពុជា សម្តែងជាចម្ងល់ និងផ្តាំទៅលោក សាន្ត ប៊ុនថាន មេប៉េអឹម ខេត្តក្រចេះ ថាកូននេះបានកាំភ្លើងមកពីណា ។ បេីមានរឿងសម្របសម្រួល ឱ្យមកកុំឱ្យ គេចខ្លួន កុំយកតួនាទីបិទបាំងអំពើអាក្រក់ របស់កូន , តុលាការកោះហៅត្រូវតែមក ។
សូមបញ្ជាក់ថា៖ លោក ហាក់ ហ៊ាន់ តំណាង អយ្យការ អមសាលាដំបូងខេត្តកំពង់ចាម កាលពីថ្ងៃទី២៤ ខែមីនា ឆ្នាំ២០១៩ បានចេញ ដីកាបញ្ជាឱ្យចូលខ្លួន ដោយអនុញ្ញាតឱ្យ មន្ត្រីនគរបាលយុត្តិធម៌ប្រេីប្រាស់កម្លាំង សាធារណៈដេីម្បីបង្ខំឱ្យលោកស័ក្តិ ៤ សាន្ត សុខុម កូនប្រុសមេប៉េអឹម ខេត្តក្រចេះ បង្ហាញខ្លួន ។
តុលាការបានតម្រូវឱ្យលោកសក្តិ៤ សាន្ត សុខុម បង្ហាញខ្លួននៅអយ្យការ អមសាលាដំបូងខេត្ត កំពង់ចាមឱ្យ បានមុនថ្ងៃ ទី ២៦ ខែមេសា ឆ្នាំ២០១៩ ក្នុងបទល្មើស ហិង្សាដោយចេតនា មានស្ថានទម្ងន់ទោស ដោយ គំរាមកំហែងនឹងអាវុធ ។
មន្ត្រីកងរាជ អាវុធហត្ថខេត្តក្រចេះ លោក សក្តិ៤ សាន្ត សុខុម កូនប្រុសមេ ប៉េអឹមខេត្ត ក្រចេះបានគេចខ្លួន ពីលំនៅឋានក្រោយ ជនរងគ្រោះដាក់ពាក្យបណ្ដឹងផ្លូវការចូល ស្នងការនគរបាលខេត្តកំពង់ចាម ៕

ដោយ៖ ចេស្តា