ភ្នំពេញ៖ ជនសង្ស័យ២នាក់ ត្រូវបាននគរបាលប៉ុស្តិ៍ឫស្សីកែវ ឃាត់ខ្លួន ខណៈពួកគេចេញពីក្លិបម៉ូណាកូអស់លុយ ក៏បែកគំនិតជិះម៉ូតូដើរលួចទ្រព្យសម្បត្តិប្រជាពលរដ្ឋតាមផ្ទះ ប៉ុន្តែមិនទាន់បានលួចផង ក៏ត្រូវនគរបាលឃាត់ខ្លួនមុន បង្កការភ្ញាក់ផ្អើលកាលពីវេលាម៉ោង៣ទៀបភ្លឺ ឈានចូលថ្ងៃទី១២ខែធ្នូ ឆ្នាំ២០១៥ នៅចំណុចការដ្ឋានសំណង់មួយកន្លែង តាមផ្លូវបេតុង ស្ថិតក្នុងក្រុម១៤ ភូមិបឹងសាឡាង សង្កាត់ ខណ្ឌឫស្សីកែវ។
សមត្ថកិច្ចបានឲ្យដឹងថា ជនសង្ស័យទី១-ឈ្មោះ ចាន់បូណា ហៅបារាំង ភេទប្រុស អាយុ២៤ឆ្នាំ មុខរបរមិនពិតប្រាកដ ស្នាក់នៅសង្កាត់ភ្នំពេញថ្មី ខណ្ឌសែនសុខ និងទី២-ឈ្មោះ ណៃ ហុង ភេទប្រុស អាយុ២១ឆ្នាំ នៅភូមិត្រពាំងរាំងចាស់ សង្កាត់ខ្មួញ ខណ្ឌសែនសុខ មុខរបរមិនពិតប្រាកដ។
ក្នុងការឃាត់ខ្លួនជនសង្ស័យទាំង២នាក់ សមត្ថកិច្ចបានដកហូតម៉ូតូស៊ុយហ្ស៊ុយគីវីវ៉ា ពណ៌ក្រហមមួយគ្រឿង ពាក់ស្លាកលេខបាត់ដំបង1H-4758 ហើយក៏បានយកមកសាកសួរនៅប៉ុស្តិ៍រដ្ឋបាលឫស្សីកែវ រួចបញ្ជូនបន្តទៅអធិការដ្ឋាននគរបាលខណ្ឌឫស្សីកែវចាត់ការបន្ត។
នៅចំពោះមុខសមត្ថកិច្ច ជនសង្ស័យទាំង២នាក់ បានសារភាពថា ពួកគេពិតជាបានជិះម៉ូតូប៉ុនប៉ងលួចទ្រព្យសម្បត្តិប្រជាពលរដ្ឋមែន ព្រោះពួកគេចេញពីក្លិបរាំលេងហើយអស់លុយ ក៏បែកគំនិតដើរលួចតែមិនទាន់បានធ្វើសកម្មភាពលួចផងក៏ត្រូវសមត្ថកិច្ចចាប់បានតែម្តង៕
ដោយ៖ វិបុល
