ភ្នំពេញ៖ នៅវេលាម៉ោង១២ថ្ងៃត្រង់ ថ្ងៃទី១៣ ខែធ្នូ ឆ្នាំ២០១៥ ស្ថិតនៅចំណុចមន្ទីរពេទ្យព្រះកុសុមៈ ហៅពេទ្យលោកសង្ឃ ភូមិត្រពាំងឈូក សង្កាត់ទឹកថ្លា ខណ្ឌសែនសុខ រាជធានីភ្នំពេញ មានករណីចុះបង្ក្រាបគ្រឿងញៀន ធ្វើឡើងដោយអាជ្ញាធរមានសមត្ថកិច្ចចម្រុះដែលពាក់ព័ន្ធ ។
លោកតុង សីហា អ្នករាយការណ៍ព័ត៌មានមជ្ឈមណ្ឌលព័ត៌មាននគរវត្តបានរាយការណ៍មកថា ក្នុងប្រតិបត្តិការនេះ សមត្ថកិច្ចចម្រុះបានឃាត់ខ្លួនមនុស្សមួយចំនួន រួមទាំងវត្ថុតាងដូចជាគ្រឿងញៀន និងឧបករណ៍ច្រើនទៀតដែលមិនទាន់អាចរាប់ចំនួនបានឡើយស្ថិតនៅក្នុងកាលៈទេសៈភ្លាមៗនេះ ។
សូមបញ្ជាក់ថា ទីតាំងភូមិត្រពាំងឈូក សង្កាត់ទឹកថ្លា ខណ្ឌសែនសុខ រាជធានីភ្នំពេញ ឬហៅថា ខាងមុខមន្ទីរពេទ្យលោកសង្ឃនោះ មានការបង្ក្រាបគ្រឿងញៀនសឹងថា រាល់ថ្ងៃតែម្តង ប៉ុន្តែមិនដឹងយ៉ាងម៉េច សមត្ថកិច្ចនៅតែអសមត្ថភាពមិនអាចបោសសម្អាតប្លុកនេះមិនឲ្យមានករណីគ្រឿងញៀននោះបានឡើយ ៕
ដោយ៖ ថាច់ យ៉ាត
