ភ្នំពេញ៖ មានករណីគ្រោះថ្នាក់ចរាចរណ៍មួយបើកម៉ូតូបុកខឿនពុះចែកទ្រូវផ្លូវ បណ្តាលអោយបុរសម្នាក់បានបាក់កស្លាប់ភ្លាមៗនៅកន្លែងកើតហេតុ ម្នាក់ទៀតរងរបួសធ្ងន់កំពុងត្រូវបានជួយសង្រ្គោះនៅមន្ទីរពេទ្យ នឹងម្នាក់ទៀតជាអ្នកបើកបរម៉ូតូឌុបជនរងគ្រោះរងរបួសស្រាលឃើញដៃគូស្លាប់ក្នុងថ្លុកឈាមទាញម៉ូតូបើករត់គេចខ្លួនបាត់ស្រមោល ។
ហេតុការណ៍ខាងលើបានកើតឡើងកាលពីវេលាម៉ោង២នឹង១៥នាទីរសៀលថ្ងៃទី១៣ ខែធ្នូ ឆ្នាំ២០១៥ តាមបណ្តោយផ្លូវវេងស្រេង ទល់មុខផ្សារកាណាឌីយ៉ា ភូមិត្រពាំងថ្លឹង សង្កាត់ចោមចៅ ខណ្ឌពោធិសែនជ័យ ។
សាក្សីកន្លែងកើតហេតុបានអោយដឹងថា មុនពេលកើតហេតុបានឃើញយុវជន៣នាក់ជិះម៉ូតូ១គ្រឿងក្នុងល្បឿនលឿន ហើយជ្រុលចង្កូតក៏ទៅបុកខឿនពុះចែកទ្រូងផ្លូវ បណ្តាលអោយអ្នកជិះខាងក្រោយ២នាក់ធ្លាក់ពីលើម៉ូតូ ម្នាក់បាក់កស្លាប់ នឹងម្នាក់ទៀតរបួសធ្ងន់។ ដោយឡែកអ្នកបើកបរ របួសស្រាលឃើញបក្ខពួករបស់ខ្លួនស្លាប់ ក៏បើកម៉ូតូគេចខ្លួនតែម្តង ៕
ដោយ៖ សុខា សែនជ័យ
