ភ្នំពេញ៖ បុរសម្នាក់ស្រវឹងស្រាជោគជាំបានថយរថយន្តបុកម៉ូតូយុវជន៣នាក់ ខណៈកំពុងឈប់ស្តុបបណ្តាលគៀបជាប់ក្រោមរថយន្ត សំណាងល្អមិនមានអ្នករងរបួស ។

ដែលហេតុការណ៍នេះបានកើតឡើងកាលពីវេលាម៉ោង៨ និង១៥នាទីយប់ថ្ងៃទី១៣ ខែធ្នូ ឆ្នាំ២០១៥ នៅចំណុចមុខស្ថានីយ៍ប្រេងឥន្ឋនតេលា ស្តុបអាងទឹកអូឡាំពិច តាមបណ្តោយផ្លូវព្រះមុន្នីរ៉េត ស្ថិតក្នុងសង្កាត់ ខណ្ឌ៧មករា ។

សាក្សីនៅកន្លែងកើតហេតុដែលបានឃើញហេតុការណ៍នេះបានអោយដឹងថា មុនពេលកើតហេតុមានរថយន្តកូរ៉ូឡា ពណ៍ទឹកប្រាក់ ពាក់ស្លាកលេខ ភ្នំពេញ 2U-6586 បើកបរតាមបណ្តោយផ្លូវព្រះមុន្នីរ៉េត ហើយមកដល់ចំណុចកើតហេតុក៏បានឈប់ភ្លើងស្តុបក្រហម ពេលនោះមានយុវជន៣នាក់ជិះម៉ូតូស្មាស ពណ៍ស ពាក់ស្លាកលេខ1FI-1745 មកពីក្រោយឈប់ស្តុបដូចគ្នា ។

ប្រភពបន្តថា ពេលនោះស្រាប់តែរថយន្តបានថយក្រោយបុកម៉ូតូពេញទំហឹងតែម្តង បណ្តាលអោយម៉ូតូគៀបជាប់ក្រោមរថយន្តរងការខូចខាតយ៉ាងដំណំ សំណាងមិនមានអ្នករងរបួសនោះទេ ហើយក្រោយពីបង្កហេតុបុរសបើករថយន្តចុះពីលើរថយន្តមកទាំងស្ថានភាពស្រវឹងស្រាជោគជាំបានក្របួចក.អាវជនរងគ្រោះបំរុងវាយ បង្កការភ្ញាក់ផ្អើលដល់អ្នកដំណើរនាំគ្នាជួយអន្តរាគមន៍ឃាត់ភ្លាមៗផងដែរ ។

ភ្លាមនោះសមត្ថកិច្ចក៏បានមកដល់កន្លែងកើតហេតុ និងបានឃាត់អ្នកបើករថយន្តបង្កដែលប្រុងបើករត់ និងបានធ្វើការវាស់វែងយករថយន្តនិងម៉ូតូទៅអធិការដ្ឋាននគរបាលខណ្ឌ៧មករា ដើម្បីចាត់ការទៅតាមផ្លូវច្បាប់ ៕

ដោយ៖ ស រស្មី