ភ្នំពេញ៖ ស្ត្រីម្នាក់ចុះពីលើរថយន្តគោលបំណងសម្តៅដើរចូលក្នុងផ្ទះស្រាប់តែមានជនសង្ស័យ២នាក់ជិះម៉ូតូម៉ាកវ៉េវមិនចាំស្លាកលេខបានមកធ្វើសកម្មភាពឆក់បានសម្រេចហើយ បានដកកាំភ្លើងបាញ់ក្រោមដីគម្រាមកុំឲ្យដេញ ។

ហេតុការណ៍កើតឡើងកាលវេលាម៉ោង១ និង២០នាទី ថ្ងៃទី១៤ ខែធ្នូ ឆ្នាំ២០១៥នៅចំណុចផ្ទះ៥៦A ផ្លូវលេខ៣១៨ ក្នុងសង្កាត់ទួលស្វាយព្រៃទី២ ខណ្ឌចំការមន រាជធានីភ្នំពេញ ។

បើតាមសម្តីរបស់សន្តិសុខម្នាក់ដែលយាមនៅអង្គការមជ្ឍមណ្ឌលជីវិតថ្មីបានប្រាប់ឲ្យថា មុនពេលកើតហេតុគេឃើញស្ត្រីម្នាក់វ័យប្រហែល៥០ឆ្នាំ បានជិះរថយន្តមួយគ្រឿងម៉ាកហាយឡែនឌ័រ មកឈប់បម្រុងដើរចូលផ្ទះដោយមានកាបូបស្ពាយក្នុងដៃ ស្រាប់តែមានជនសង្ស័យ២នាក់ជិះម៉ូតូម៉ាកវ៉ែវមួយគ្រឿងមិនចាំស្លាកលេខ បានធ្វើសកម្មភាពឆក់កាបូបបានសម្រេចហើយ ស្រាប់តែជនសង្ស័យអង្គុយខាងក្រោយបានដកកាំភ្លើងមិនស្គាល់ម៉ាកបានបាញ់ចុះក្រោមដីគម្រាមកុំឲ្យជនរងគ្រោះនិងប្រជាពលរដ្ឋដេញតាម ។

ក្រោយកើតហេតុជនសង្ស័យគេចខ្លួនបាត់ដោយសុវត្ថិភាព ចំណែកជនរងគ្រោះត្រូវបានសមត្ថកិច្ចកំពុងសាកសួរ ៕

ដោយ៖ ស រស្មី