ភ្នំពេញ៖ នៅក្នុងកិច្ចប្រជុំស្តីពីការផ្សព្វផ្សាយទស្សនទានសីលធម៌សាសនាដើម្បីសុខដុមនីយកម្មនៅកម្ពុជា ក្នុងទិវាសកម្មភាពសាសនា ដើម្បីកុមារនៅកម្ពុជា ព្រឹកថ្ងៃទី១៤ ខែធ្នូ ឆ្នាំ២០១៥ សម្តេចតេជោ ហ៊ុន សែន បានបញ្ជាឱ្យសមត្ថកិច្ចពាក់ព័ន្ឋទាំងអស់ រួមទាំងអាជ្ញាធរគ្រប់មូលដ្ឋាន ត្រូវតែបង្កើនការយកចិត្តទុកដាក់វាយបង្ក្រាបក្រុមចោរប្រដាប់អាវុធដែលធ្វើសកម្មភាពប្លន់ប្រជាពលរដ្ឋយ៉ាងសាហាវនាពេលថ្មីៗកន្លងមកនេះនៅទូទាំងប្រទេសដោយគ្មានការលើកលែងឡើយ ព្រោះក្រុមនេះគឺជាក្រុមឧក្រិដ្ឋជនគ្មានសាសនា។
ទន្ទឹមនឹងនេះ សម្តេចក៏បានសុំឲ្យបងប្អូនប្រជាពលរដ្ឋបង្កើននូវការប្រុងប្រយ័ត្ន ហើយសហការ និងរាយការណ៍ជូនមកសមត្ថកិច្ចជាបន្ទាន់ដើម្បីទប់ស្កាត់ និងបង្ក្រាបអំពើប្លន់ប្រដាប់អាវុធ និងក្រុមជនពាលឃោរឃៅទាំងនោះ។
សម្តេចតេជោ ហ៊ុន សែន បានបញ្ជាក់ជាច្រើនសារដល់លោករដ្ឋមន្ត្រីក្រសួងយុត្តិធម៌ ធ្វើការពិនិត្យឱ្យបានល្អិតល្អន់បំផុតចំពោះការលើកលែងទោសឱ្យទណ្ឌិតនៅក្នុងពន្ធនាគារ ដើម្បីចៀសវាងការលើកលែងទោសអោយក្រុមចោរដែលមានមុខដដែលៗ ដែលចេញមកបង្កអំពើចោរកម្ម និង អសន្តិសុខដល់សង្គមជាតិ ៕
