ភ្នំពេញ៖ បុរសជាជនជាតិបរទេសម្នាក់ស្រវឹងជិះម៉ូតូមួយគ្រឿងដឹកនារីខ្មែរម្នាក់ដែលស្រវឹងដូចគ្នាបើកក្នុងល្បឿនលឿនបានវ៉ារថយន្ដមួយគ្រឿងជ្រុលទៅបុកជាមួយម៉ូតូមួយគ្រឿងទៀតដែលធ្វើដំណើរបញ្ច្រាសទិសគ្នាពេញទំហឹងបណ្ដាលអោយរងរបួសធ្ងន់ពីរនាក់និងស្រាលម្នាក់ ។

ហេតុការណ៍គ្រោះថ្នាក់ចរាចរណ៍នេះបានកើតឡើងកាលពីវេលាម៉ោង២ និង៣០នាទីរំលងអាធ្រាត្រ ឈានចូលថ្ងៃទី១៥ ខែធ្នូ ឆ្នាំ២០១៥ តាមបណ្ដោយផ្លូវលេខ៧០ កែងនឹងផ្លូវបឹងកក់ ស្ថិតក្នុងសង្កាត់ស្រះចក ខណ្ឌដូនពេញ រាជធានីភ្នំពេញ ។

ប្រភពព័ត៌មានពីកន្លែងកើតហេតុបានអោយដឹងថា នៅមុនពេលកើតហេតុគេបានឃើញមានបុរសជាជនជាតិបរទេសម្នាក់ជិះម៉ូតូម៉ាក ស៊ុយស៊ូគីឡេត ពណ៍ខ្មៅ ពាក់ស្លាកលេខ ភ្នំពេញ1CN-7243 និងមានឌុបនារីខ្មែរម្នាក់ដែលមានសភាពស្រវឹងដូចគ្នា ដោយធ្វើដំណើរតាមបណ្ដោយផ្លូវលេខ៧០ទិសដៅពីកើតទៅលិចហើយបានវ៉ារថយន្ដមួយគ្រឿងមិនចាំម៉ាកក៏ជ្រុលទៅបុកម៉ូតូមួយគ្រឿងទៀតម៉ាក វ៉េវ ពណ៍ខ្មៅ ពាក់ស្លាកលេខ ភ្នំពេញ1CM-2239 ដែលជិះដោយបុរសម្នាក់ធ្វើដំណើរបញ្ច្រាសទិសគ្នាពេញទំហឹងបណ្ដាលអោយបុរសជនជាតិបរទេស និងនារីម្នាក់រងរបួសធ្ងន់ និងបុរសជិះម៉ូតូវ៉េវ រងរបួសស្រាល ។

ប្រភពដដែលបានបន្តថាក្រោយពីកើតហេតុរថយន្ដសង្គ្រោះបន្ទាន់បានទៅយកជនរងគ្រោះទៅសង្គ្រោះនៅមន្ទីរពេទ្យ ចំណែកអ្នករបួសស្រាលដើរចូលផ្ទះបាត់។ ក្រោយមកកម្លាំងសមត្ថកិច្ចមូលដ្ឋានបានចុះដល់កន្លែងកើតហេតុ និងបានសហការណ៍ជាមួយកម្លាំងជំនាញចុះធ្វើការវាស់វែងយកម៉ូតូទាំងពីរគ្រឿងយកទៅរក្សាទុកនៅការិយាល័យចរាចរណ៍រាជធានីភ្នំពេញ ដើម្បីរងចាំដោះស្រាយតាមនិតិវិធីច្បាប់ ។

សមត្ថកិច្ចប្រាប់ថា  ជនបរទេស និងនារីជាជនជាតិខ្មែរនោះនៅមិនទាន់ស្គាល់អត្តសញ្ញាណនៅឡើយទេ  ដោយសាររបួសធ្ងន់ធ្ងរពេក ហើយម៉្យាងវិញទៀតបើកបរស្ថិតក្នុងស្ថានភាពស្រវឹងស្រាជោគជាំផង មិនអាចគ្រប់គ្រងស្ថានការណ៍ពេលមានបញ្ហាគ្រោះថ្នាក់ចរាចរណ៍ដែលកើតឡើងចំពោះមុខ ៕

ដោយ៖ ព្រែកជ័យ