ខេត្ដព្រះសីហនុ៖ នគរបាលការិយា ល័យព្រហ្មទណ្ឌកម្រិតធ្ងន់នៃស្នងការដ្ឋាន នគរបាលខេត្ដព្រះសីហនុបានឃាត់ខ្លួន បុរសម្នាក់ក្នុងចំណោម២នាក់ពាក់ព័ន្ធ ធ្វើសកម្មភាពឆបោកយកដីរបស់អ្នក ដទៃលក់រួចយកលុយទៅចែកគ្នា ។
ករណីចាប់ខ្លួនជនសង្ស័យខាងលើនេះ នគរបាលបានធ្វើឡើងនៅវេលាម៉ោង៣ និង២០នាទីរសៀលថ្ងៃទី១៣ ខែធ្នូ ឆ្នាំ ២០១៥ រួចកសាងសំណុំរឿងបញ្ជូនទៅ តុលាការកាលពីថ្ងៃទី១៤ ខែធ្នូ ឆ្នាំ ២០១៥ ដើម្បីចាត់ការតាមផ្លូវច្បាប់ ។
ជនសង្ស័យដែលត្រូវបានចាប់ខ្លួន ឈ្មោះ ផែង កែវ ហៅម៉ែន អាយុ៤០ឆ្នាំ មុខរបរជាងសំណង់ បច្ចុប្បន្នរស់នៅ ក្រុមទី៦ ភូមិ៦ សង្កាត់លេខ៤ ក្រុង-ខេត្ដព្រះសីហនុ ។ រីឯជនសង្ស័យម្នាក់ ទៀតឈ្មោះ អ៊ឹង វ៉ាន់នី ភេទប្រុស អាយុ ៣៩ឆ្នាំ មុខរបរមិនពិតប្រាកដ បច្ចុប្បន្ន រស់នៅភូមិកោះប្រាក់ ឃុំកោះទន្ទឹម ស្រុកកំពង់សៀម ខេត្ដកំពង់ចាម (គេច ខ្លួន) ។
នគរបាលបញ្ជាក់ថា ជនសង្ស័យ ដែលត្រូវបានឃាត់ខ្លួនខាងលើនេះធ្វើ ឡើងតាមបណ្ដឹងរបស់ឈ្មោះ ឯម ដាំ ភេទប្រុស អាយុ៤៣ឆ្នាំ មុខរបរនេសាទ បច្ចុប្បន្នរស់នៅក្រុមទី៣៧ ភូមិ៥ សង្កាត់លេខ៤ ក្រុង-ខេត្ដព្រះសីហនុ ។
តាមមន្ដ្រីនគរបាលឱ្យដឹងថា បើ យោងតាមការបំភ្លឺពីជនរងគ្រោះឈ្មោះ ឯម ដាំ ឱ្យដឹងថា កាលពីថ្ងៃទី៣០ ខែ កញ្ញា ឆ្នាំ២០១៥ មានឈ្មោះ គឹម មន និងឈ្មោះ មាស ទិត្យ បច្ចុប្បន្នរស់នៅ ក្រុម៣៧ ភូមិ៥ សង្កាត់លេខ៤ ក្រុង- ខេត្ដព្រះសីហនុ បានមកហៅឱ្យខ្លួន(ឯម ដាំ) ទៅទិញដីរបស់ឈ្មោះ អ៊ឹង វ៉ាន់នី (ជនសង្ស័យដែលរត់គេចខ្លួន)និងឈ្មោះ ផែង កែវ (ជនសង្ស័យដែលត្រូវបាន ចាប់ខ្លួន) ដែលមានទីតាំងស្ថិតនៅភូមិ គគីរ ឃុំបិតត្រាំង ស្រុកព្រៃនប់ ខេត្ដ ព្រះសីហនុ ដែលមានទំហំ៥.៤០៣ម៉ែត្រ ការ៉េ ដោយម្ចាស់ដីលក់ក្នុងតម្លៃ៦ម៉ឺន ដុល្លារ ។ ពេលនោះរូបគាត់បានតថ្លៃឱ្យ ចំនួន២.៥០០០ដុល្លារ បន្ទាប់មកឈ្មោះ អ៊ឹង វ៉ាន់នី និងឈ្មោះផែងកែវ បានឯក ភាពលក់ក្នុងតម្លៃដែលបានតថ្លៃនេះ។ ក្រោយមករូបគាត់និងឈ្មោះ គឹម មន , ឈ្មោះ មាស ទិត្យ ព្រមទាំងឈ្មោះអ៊ឹង វ៉ាន់នី និងឈ្មោះ ផែង កែវ បាននាំគ្នា ទៅកាន់សាលាឃុំបិតត្រាំង ស្រុកព្រៃ នប់ ដើម្បីធ្វើកិច្ចសន្យាកក់ប្រាក់ចំនួន ៧ពាន់ដុល្លារ ដោយនៅសល់ចំនួន ១.៨០០០ដុល្លារទៀត ។ ក្នុងលក្ខខណ្ឌ ពេលរត់ការឯកសារផ្ទេរសិទ្ធិលក់ដីរួច រាល់និងប្រគល់ប្រាក់ផ្ដាច់គ្រប់ចំនួនដែល នៅសល់១.៨០០០ពាន់ដុល្លារទៀត ។
ជនរងគ្រោះឈ្មោះ ឯម ដាំ បានបំភ្លឺ ទៀតថា រហូតដល់ថ្ងៃទី២ ខែតុលា ឆ្នាំ ២០១៥ គាត់ក៏ឃើញឈ្មោះ អ៊ឹង វ៉ាន់នី និងឈ្មោះ ផែង កែវ យកឯកសារដែល រត់ការផ្ទេរសិទ្ធិលក់ដីមកឱ្យរូបគាត់ មើល ។ ពេលនោះរូបគាត់បានពិនិត្យ ឃើញមានចុះហត្ថលេខាពីមេភូមិគគីរ ឈ្មោះ ហ៊ួត សុខជា និងមេឃុំបិទត្រាំង ឈ្មោះ ព្រុំ កែម ព្រមទាំងមានចុះហត្ថ លេខាអភិបាលស្រុកព្រៃនប់លោក អក សុងហ៊ន ទៀតផង ។ គ្រានោះរូបគាត់ក៏ បានប្រគល់ប្រាក់ចំនួន១.៨០០០ដុល្លារ បន្ថៃមទៀតទៅឱ្យជនសង្ស័យសរុបទាំង ២លើកចំនួន២.៥០០០ដុល្លារ ។ លុះ ដល់ថ្ងៃទី២៥ ខែតុលា ឆ្នាំ២០១៥ ទើប រូបគាត់ដឹងថា ដីដែលឈ្មោះ ផែង កែវ លក់មកឱ្យនោះមានម្ចាស់ដីគេគ្រប់គ្រង តាំងពីឆ្នាំ២០០៧ មកម្ល៉េះ ។ ដូច្នេះ ឈ្មោះ អ៊ឹង វ៉ាន់នី និងឈ្មោះ ផែង កែវ គ្មានដីនៅកន្លែងទីតាំងលក់ឱ្យរូបគាត់ នេះទេ ។
ចំណែកឈ្មោះ គឹម មន ភេទស្រី អាយុ៥៧ឆ្នាំ ជាជើងសារបានបំភ្លឺថា រូបគាត់មិនបានស្គាល់ឈ្មោះ អ៊ឹង វ៉ាន់នី និងឈ្មោះ ផែង កែវ ជាម្ចាស់ដីនោះទេ ដោយសារឈ្មោះ មាស ទិត្យ ជាអ្នករក ស៊ីគក់ជេរដីជាមួយរូបគាត់បានប្រាប់ថា ឈ្មោះ អ៊ឹង វ៉ាន់នី និងឈ្មោះ ផែង កែវ មានដីមួយកន្លែង ស្ថិតនៅភូមិគគីរ ឃុំ បិទត្រាំង ស្រុកព្រៃនប់ គេរកលក់ ទើប រូបគាត់នាំជនរងគ្រោះឈ្មោះឯម ដាំ ទៅ មើល និងទិញប៉ុណ្ណោះ ។
តាមចុងបណ្ដឹងឈ្មោះ ផែង កែវ បាន ឱ្យដឹងថា កាលពីថ្ងៃទី៣០ ខែកញ្ញា រូប គេពិតជាបានលក់ដីនៅចំណុចភូមិគគីរ ឃុំបិតត្រាំង ទៅឱ្យឈ្មោះ ឯម ដាំ ដែល មានទំហំបណ្ដោយ៣៩ម៉ែត្រ ទទឹង៥០ ម៉ែត្រ នៅជាប់ខាងក្រោយដីរបស់ឈ្មោះ អ៊ឹង វ៉ាន់នី ដែលដីនេះជាដីរបស់គាត់ ទិញពីឈ្មោះ សូ សុខ តាំងពីឆ្នាំ២០០៨ ។ ចុងបណ្ដឹងរូបនេះបានបន្ដថា ដីរបស់ គាត់និងដីរបស់ឈ្មោះ អ៊ឹង វ៉ាន់នី បាន បូកធ្វើប្លង់បញ្ចូលគ្នាដើម្បីរត់ការអស់ ប្រាក់តិច ហើយពេលលក់បានខ្លួនទទួល ប្រាក់បាន១ម៉ឺនដុល្លារ រីឯឈ្មោះអ៊ឹង វ៉ាន់នី ទទួលបាន១.៥០០ដុល្លារ ។ នៅ ក្នុងចំនួនលុយដែលលក់បាននេះមួយ ចំណែកឈ្មោះ អ៊ឹង វ៉ាន់នី បានឱ្យប្រាក់ ទៅឈ្មោះព្រុំ កែម មេឃុំបិទត្រាំង ស្រុកព្រៃនប់ ចំនួន៣០០០ដុល្លារ ដើម្បី យកទៅចាត់ចែងដល់មន្ដ្រីដែលមានចុះ ហត្ថលេខានៅក្នុងឯកសារ ។
នគរបាលបានបន្ថែមថា ផ្អែកតាម ការស្រាវជ្រាវករណីបណ្ដឹងនេះសមត្ថ កិច្ចសន្និដ្ឋានបានថា ឈ្មោះ ផែង កែវ និងឈ្មោះ អ៊ឹង វ៉ាន់នី គឺជាចារីក្នុងបទ ឆបោក ហើយឈ្មោះ ឯម ដាំ គឺជាជនរង គ្រោះ ។ ចំពោះឈ្មោះ ហ៊ួត សុខជា មេ ភូមិគគីរ , ឈ្មោះព្រុំ សុខកែម មេភូមិ បិទត្រាំង និងឈ្មោះ អក សុងហ៊ន អភិ បាលស្រុកព្រៃនប់ គឺជាសហចារីក្នុងបទ ឆបោកដោយសារចុះហត្ថលេខាលើកិច្ច សន្យាផ្ទេរសិទ្ធិលក់ដីផ្ដាច់ដើម្បីបានប្រាក់ ពីឈ្មោះ ផែង កែវ និងឈ្មោះ អ៊ឹង វ៉ាន់នី ។
តាមប្រភពពីមន្ដ្រីនគរបាលបាន បង្ហើបថា មេភូមិគគីរ មេឃុំបិទត្រាំង និងចៅហ្វាយស្រុកព្រៃនប់ អាចនិងមាន ទោសទណ្ឌនៅពេលតុលាការបើកសវន ការទៅលើជនសង្ស័យដែលត្រូវបាន ចាប់ខ្លួនឈ្មោះផែង កែវ ៕
ដោយ៖ ឆ្លាមសមុទ្រ
