ភ្នំពេញ៖ បុរសពីរនាក់បានរងរបួសធ្ងន់ធ្ងរដោយតែពួកគេជិះម៉ូតូមួយគ្រឿងត្រូវរថយន្ដកាមរីហាយព្រីធបុកចំពីមុខពេញទំហឹងបណ្តាលអោយរងរបួសធ្ងន់ ត្រូវបានរថយន្តសង្គ្រោះដឹកយកទៅសង្គ្រោះភ្លាមៗនៅមន្ទីរពេទ្យ ហើយម្ចាស់រថយន្ដបានបើកទ្វាររថយន្ដចុះរត់គេចខ្លួនបាត់។
ហេតុការណ៍គ្រោះថ្នាក់ចរាចរណ៍នេះបានកើតឡើងកាលពីវេលាម៉ោង២៣និង០០នាទីយប់ថ្ងៃទី១៦ ខែធ្នូ ឆ្នាំ២០១៥ តាមបណ្ដោយផ្លូវលេខ៧០ នៅចំណុចខាងមុខផ្ទះសំណាក់ វិមានបឹងកក់ ស្ថិតក្នុងសង្កាត់ ស្រះចក ខណ្ឌដូនពេញ រាជធានីភ្នំពេញ។
ប្រភពព័ត៌មានពីកន្លែងកើតហេតុបានអោយដឹងថា នៅមុនពេលកើតហេតុគេបានឃើញមានបុរសពីរនាក់ជិះម៉ូតូម៉ាកហុងដា ណៃហត ពណ៍ខ្មៅ គ្មានស្លាកលេខ ធ្វើដំណើរតាមបណ្ដោយផ្លូវលេខ៧០ ទិសដៅពីកើតទៅលិច លុះមកដល់ចំណុចកើតហេតុក៏មានរថយន្ដមួយគ្រឿងម៉ាកកាមរីហាយព្រីធ ពណ៍ទឹកប្រាក់ ពាក់ស្លាកលេខ ភ្នំពេញ2V-7577 បើកបរដោយបុរសម្នាក់ស្ថិតក្នុងស្ថានភាពស្រវឹងស្រាជោគជាំ ធ្វើដំណើរទិសដៅបញ្ច្រាសទិសគ្នាហើយបានវ៉ាម៉ូតូពីរគ្រឿងផ្សេងទៀត ជ្រុលទៅបុកម៉ូតូណៃហតពេញទំហឹងបណ្ដាលអោយអ្នកជិះម៉ូតូ បាក់ជើងទាំងពីរនាក់ចំណែកម៉ូតូនិងរថយន្ដរងការខូចខាតទាំងសងខាងយ៉ាងដំណំ។
ក្រោយពីកើតហេតុម្ចាស់រថយន្ដបានបើកទ្វាររថយន្ដចុះរត់គេចខ្លួនបាត់ស្រមោល ក្រោយមកកម្លាំងមូលដ្ឋានបានចុះដល់កន្លែងកើតហេតុនិងបានសហការណ៍ជាមួយកម្លាំងជំនាញចុះធ្វើការវាស់វែងយកម៉ូតូនិងរថយន្ដយកទៅរក្សាទុកនៅការិយាល័យចរាចរណ៍រាជធានីភ្នំពេញ ដើម្បីរងចាំធ្វើការដោះស្រាតាមនិតិវិធីច្បាប់។
សមត្ថកិច្ចប្រាប់ថា ខាងភាគីអ្នកបើករថយន្តបើកបរក្នុងល្បឿនលឿនដោយមិមានការប្រុងប្រយ័ត្ន មិនគោរពច្បាប់ចរាចរណ៍ ថែមទាំងប្រើប្រាសនូវសារធាតុស្រវឹងជោកជាំទៀតផង ៕
ដោយ៖ ព្រែកជ័យ
