ភ្នំពេញ ៖ ជនសង្ស័យម្នាក់ បានធ្វើសកម្មភាពថ្មើរជើងមកឆក់ទូរស័ព្ទដៃមួយគ្រឿងពីបុរសម្នាក់ ដែលជាអ្នកតន្រ្តីករបានសម្រេច ហើយព្យាយាមរត់គេចខ្លួន តែត្រូវជនរងគ្រោះរត់ដេញតាមពីក្រោយនិងស្រែកឆោឡោផ្អើលកម្លាំងប៉ុស្តិ៍នគរបាលរដ្ឋបាលជ័យជំនះ នៃអធិការដ្ឋាននគរបាលខណ្ឌដូនពេញ កំពុងជិះល្បាតក្បែរនោះក៏ឃាត់ខ្លួនបានជាក់ស្តែងជាមួយនឹងវត្ថុតាងផងដែរ ។
ជនសង្ស័យខាងលើនេះ ត្រូវបានសមត្ថកិច្ចឃាត់ខ្លួនពីបទលួចមានស្ថានទម្ងន់ទោសប្រើអំពើហិង្សា (ដើរឆក់ទូរស័ព្ទដៃ) កាលពីវេលាម៉ោង១០និង១០នាទីយប់ថ្ងៃព្រហស្បតិ៍ ៤កើត ខែពិសាខ ឆ្នាំកុរ ឯកស័ក ព.ស២៥៦៣ ត្រូវនឹងថ្ងៃទី៦ ខែមិថុនា ឆ្នាំ២០១៩ នៅចំណុចមុខវត្តឧណ្ណាលោម ផ្លូវព្រះស៊ីសុវត្ថិ ភូមិទី១ សង្កាត់ជ័យជំនះ ខណ្ឌដូនពេញ រាជធានីភ្នំពេញ ។
ជនសង្ស័យត្រូវឃាត់ខ្លួនឈ្មោះ កង បញ្ញា ភេទប្រុស អាយុ២៤ឆ្នាំ ជនជាតិខ្មែរមុខរបរ និងទីលំនៅមិនពិតប្រាកដ ។ ចំណែកជនរងគ្រោះឈ្មោះ លឹម ស៊ាង ភេទប្រុស អាយុ៥០ឆ្នាំ ជនជាតិខ្មែរ មុខរបរ តន្ត្រីករ ស្នាក់នៅផ្ទះលេខ17EO ផ្លូវលេខ47 ភូមិ15 សង្កាត់ស្រះចក ខណ្ឌដូនពេញ រាជធានីភ្នំពេញ។ វត្តុតាងចាប់យកមាន ៖ ទូរស័ព្ទដៃ០១គ្រឿងម៉ាក HUAWEI ពណ៌ទឹកបិច (បានប្រគល់ជូនជនរងគ្រោះវិញ)។
យោងតាមរបាយការណ៍របស់នគរបាលខណ្ឌដូនពេញ បានឲ្យដឹងថា មុខពេលកើតហេតុថ្ងៃទី០៦ ខែមិថុនា ឆ្នាំ២០១៩ម៉ោង១០និង១០នាទីយប់ ជនរងគ្រោះបានដើរមកអង្គុយលេងលើថ្មម៉ាបមាត់ទន្លេមុខវត្តឧណ្ណា លោមផ្លូវព្រះស៊ីសុវត្ថិ ភូមិទី១ សង្កាត់ជ័យជំនះ ខណ្ឌដូនពេញរាជធានីភ្នំពេញ បានយកទូរស័ព្ទដៃម៉ាក HUAWEI ពណ៌ទឹកបិចមកចុចលេង ពេលនោះមានជនសង្ស័យបានដើរមកជិតជនរងគ្រោះហើយធ្វើសកម្មភាពឆក់យកទូរស័ព្ទដៃពីដៃជនរងគ្រោះបានសំរេចរត់គេចខ្លួន ពេលនោះជនរងគ្រោះស្រែកឆោរឡោរត់ដេញតាមពីក្រោយហើយជនសង្ស័យរត់ឆ្លងផ្លូវមកដល់ចំណុចផ្លូវសុធារសកែងផ្លូវលេខ១៧៨ ភូមិ២ សង្កាត់ជ័យជំនះ ត្រូវបានកម្លាំងនគរបាលប៉ុស្តិ៍ជ័យជំនះដែលកំពុងល្បាតឃើញបានអន្តរាគមន៍ឃាត់ខ្លួនជនសង្ស័យបាន រួមជាមួយវត្ថុតាងទូរស័ព្ទដៃ០១គ្រឿងរបស់ជនរងគ្រោះ ដែលឆក់បានយកមកធ្វើការសាកសួរនៅប៉ុស្តិ៍នគរបាលរដ្ឋបាលជ័យជំនះតែម្តង។
ចំពោះមុខកម្លាំងប៉ុស្តិ៍និងខណ្ឌកំពុងប្រើវិធានការជំនាញសួរចម្លើយរកបក្ខពួកនិងសកម្មភាពដែលបានប្រព្រឹត្តកន្លងមកហើយ កសាងសំណុំរឿងតាមនីតិវិធី៕ស រស្មី
...
