ភ្នំពេញៈ កម្លាំងកងរាជអាវុធហត្ថរាជធានីភ្នំពេញបានបញ្ជូនអតីតប្រុសស្អាត(ហ្រ្វេសស៊ីប៊យ)ឆ្នាំ ២០១២ ម្នាក់មកអយ្យការអម សាលាដំបូងរាជធានីភ្នំពេញដើម្បីសាកសួរពាក់ព័ន្ធលួចរថយន្តទំនើបជនជាតិចិនម្នាក់។
ការបញ្ជូនអតីតប្រុសស្អាត(ហ្រ្វេសស៊ីប៊យ) ឆ្នាំ ២០១២ទៅសាលាដំបូងរាជធានីភ្នំពេញ បានប្រព្រឹត្តទៅតាំងព្រឹកថ្ងៃទី១៧ ខែធ្នូ ឆ្នាំ២០១៥ មកម្ល៉េះប៉ុន្តែទើបបែកធ្លាយនៅថ្ងៃម្សិលមិញនេះ គ្រាដែលសមត្ថកិច្ចបញ្ជូនបុរសនេះ ទៅឃុំខ្លួននៅពន្ធនាគារតាមអំណាចដិកាតុលាការ ។
ប្រភពព័ត៌មានពីមន្រី្តកងរាជអាវុធហត្ថឲ្យដឹងថាប្រុសស្អាតរូបនេះឈ្មោះ ហេង ថៃ អាយុ២៥ឆ្នាំ មុខរបរមិនពិតប្រាកដបានលួចរថយន្ត RANGE ROVER តម្លៃជាង១០ម៉ឺនដុល្លារពីបុរសជនជាតិចិនឈ្មោះ លី ស៊ីប៊ីង កាលពីចុងសប្តាហ៍នេះនៅហាងម៉ាស្សាឡាក់គីហ្វូត ហើយទើបតែសមត្ថកិច្ចកងរាជ អាវុធហត្ថរាជធានីចាប់បានតាមពាក្យបណ្តឹងជនរងគ្រោះ។
ប្រភពព័ត៌មានដដែលបានឲ្យដឹងទៀតថា បន្ទាប់ពីចៅក្រមស៊ើបសួររួចក៏បានសម្រេចឃុំខ្លួនប្រុសស្អាតរូបនេះ ដាក់ពន្ធនាគារ ពីបទ “លួច” តាមមាត្រា៣៥៣ និង៣៥៦ នៃក្រមព្រហ្មទណ្ឌហើយ បទល្មើសនេះផ្ដន្ទាទោសពី៦ខែទៅ៣ឆ្នាំ និងពិន័យជាប្រាក់ពី១លានរៀលទៅ៦លានរៀល៕ ប្រាថ្នា
