ភ្នំពេញ ៖ បុរសម្នាក់ជាទំនងស្រវឹងស្រា បានជិះម៉ូតូម្នាក់ឯងយ៉ាងលឿនចុះតាមផ្លូវក្រោមស្ពានអាកាសស្ទឹងមានជ័យ បណ្ដាលឲ្យបុកនិងខឿនរងរបួសធ្ងន់ ហើយត្រូវបានប្រជាពលរដ្ឋហៅរថយន្តសាមុយមក ដឹក យកទៅសង្គ្រោះភ្លាមៗ កាលពីវេលាម៉ោង១១ និង១០នាទីយប់ ថ្ងៃទី១ ខែកក្កដា ឆ្នាំ២០១៩ នៅចំណុចក្រោមស្ពានអាកាសស្ទឹងមានជ័យ ក្នុងសង្កាត់ស្ទឹងមានជ័យ១ ខណ្ឌមានជ័យ រាជធានីភ្នំពេញ ។

     បុរសរងគ្រោះខាងលើមានឈ្មោះ សុខ ពិសិដ្ឋ អាយុ៣៣ឆ្នាំ មានទីកន្លែងកំណើតក្នុងសង្កាត់ផ្សារដើមគរ ខណ្ឌទួលគោក ។ អាសយដ្ឋាន នៅផ្ទះ៩ ផ្លូវលំ ភូមិទ្រា សង្កាត់ស្ទឹងមានជ័យ ខណ្ឌមានជ័យ  ។

     តាមប្រភពព័ត៌មានពីប្រជាពលរដ្ឋបានឲ្យដឹងថា មុនកើតហេតុ បុរសរងគ្រោះខាងលើ បានជិះម៉ូតូមួយគ្រឿងម៉ាក ហុងដាClick ពណ៌ស ពាក់ស្លាកលេខ ភ្នំពេញ 1GV-9302 តែម្នាក់ឯងធ្វើដំណើរតាមបណ្ដោយផ្លូវព្រះមុន្នីរ៉េត ទិសដៅពីលិចមកកើត ក្នុងល្បឿនយ៉ាងលឿនចុះតាមផ្លូវក្រោមស្ពានអាកាសស្ទឹងមានជ័យ ដោយ​មិនបង្អង់ល្បឿន ព្រមទាំងផ្លូវកោងផងនោះ ក៏ជ្រុលចង្កូតទៅបុកនិងខឿនស្ពាន បណ្ដាលឲ្យជនរងគ្រោះដួលរងរបួសធ្ងន់ ។ ភ្លាមៗប្រជាពលរដ្ឋដែលឃើញហេតុការណ៍ខាងលើក៏បានរាយការណ៍ប្រាប់សមត្ថកិច្ច និងទាក់ទងទៅរថយន្តសាមុយចុះមកជួយដឹកជនរងគ្រោះទៅសង្គ្រោះភ្លាមៗ ។

ក្នុងហេតុការណ៍ខាងលើ សមត្ថកិច្ចនគរបាលប៉ុស្ដិ៍រដ្ឋបាលស្ទឹងមានជ័យ១ បានយកសម្ភារៈរបស់ជនរងគ្រោះ មានដូចជា ៖ កាបូបលុយមាន លុយជិត700$ ខ្សែរកមួយខ្សែរ ទូរស័ព្ទ2គ្រឿង កុំព្យូទ័រយួរដៃ១គ្រឿង និងម៉ូតូមួយគ្រឿង យកទៅរក្សាទុកនៅប៉ុស្ដិ៍នគរបាលរដ្ឋបាល ស្ទឹងមានជ័យ១ រង់ចាំប្រគល់ជូនម្ចាស់ដើមវិញ ៕ដោយ៖ ភារ៉ា ដង្កោ