ខេត្តស្វាយរៀង៖ មានបុរសម្នាក់មកបុណ្យបច្ច័យបួនត្រឡប់ទៅផ្ទះវិញដួលម៉ូតូបុកដើមទ្រូងចំដៃចង្កូតរបួសធ្ងន់សន្លប់នៅនឹងកន្លែងកាលពីរវេលាម៉ោង១១យប់ ថ្ងៃទី២០ ខែធ្នូ ឆ្នាំ២០១៥ នៅលើកំណាត់ផ្លូវជាតិលេខ១ ស្ថិតនៅភូមិថ្មី សង្កាត់សង្ឃ័រ ក្រុងស្វាយរៀង ខេត្តស្វាយរៀង ។
បើតាមសមត្ថកិច្ចនគបាលក្រុងស្វាយរៀងបានឲ្យដឹងថា ជនរងគ្រោះ ឈ្មោះស៊ុំ មករា ភេទប្រុស អាយុ៣៦ឆ្នាំ មុខរបរអ្នកនេសាទត្រី មានទីលំនៅភូមិប្រសូត្រទី២ ឃុំកណ្តៀងរាយ ស្រុកស្វាយទាប ខេត្តស្វាយរៀង ។
ស្ត្រីជាប្រពន្ធឈ្មោះមុំ ស្រីតឿ អាយុ២៦ឆ្នាំ បានរៀបរាប់ទាំងទឹកភ្នែកថា មុនពេលកើតហេតុ ប្តីរបស់គាត់បានជិះម៉ូតូរួមដំណើរជាមួយអ្នកភូមិម្នាក់មកចូលរួមក្នុងពិធីបុណ្យបច្ច័យបួនបងប្អូនអ្នកជិតខាងនៅភូមិបាក់រនាស់ សង្កាត់សង្ឃ័រ ក្រុងស្វាយរៀង រហូតដល់ម៉ោង១១យប់ ទើបម្ចាស់ម៉ូតូ(មិនស្គាល់ឈ្មោះ)ឌុបគាត់(ជនរងគ្រោះ)ត្រឡប់ទៅផ្ទះវិញ ដោយអ្នកបើកម៉ូតូមានស្ថានភាពស្រវឹងផង លុះដល់ចំណុចកើតហេតុខាងលើ ក៏ដួលម៉ូតូម្នាក់ឯងបណ្តាលឲ្យជនរងគ្រោះជិះពីក្រោយរងរបួសក្បាល ដើមទ្រូង និងពោះជាទម្ងន់សន្លប់នៅនឹងកន្លែង រីឯអ្នកបើកម៉ូតូរបួសស្រាល បន្ទាប់មកសមត្ថកិច្ចហៅរថយន្តសាមុយដឹកជនរងគ្រោះមកមន្ទីរពេទ្យខេត្តដើម្បីសង្គ្រោះ ៕
ដោយ៖ យឹម សុថាន
