ភ្នំពេញ៖ ហេតុការណ៍គ្រោះថ្នាក់ចរាចរណ៍មួយបានបង្កឲ្យមានការភ្ញាក់ផ្អើលដល់ប្រជាពលរដ្ឋដែលរស់នៅក្បែរកន្លែងកើតហេតុ និងអ្នកធ្វើដំណើរតាមដងផ្លូវ ដែលបង្កដោយរថយន្តស៊េរីទំនើបបើកក្នុងល្បឿនយ៉ាងលឿនជ្រុលទៅបុករថយន្តតូរីស ត្រង់ចំណុចផ្លូវកែងបណ្ដាលឲ្យក្រឡាប់ផ្ងាជើងឡើង និងរថយន្តទាំងពីរគ្រឿងរងការខូចខាតយ៉ាងដំណំ ។
ហេតុការណ៍នេះបានកើតឡើងកាលពីវេលាម៉ោង១១និង៣០នាទីយប់ ថ្ងៃទី២១ ខែធ្នូ ឆ្នាំ២០១៥ នៅតាមបណ្ដោយផ្លូវ១៦៣ កែងផ្លូវ៣៦០(ផ្លូវឡានទឹក) ស្ថិតក្នុងសង្កាត់បឹងកេងកង៣ ខណ្ឌចំការមន។
ប្រភពព័ត៌មានពីប្រជាពលរដ្ឋដែលឃើញហេតុការណ៍នេះបានឲ្យដឹងថា មុនពេលកើតហេតុ គេឃើញរថយន្តតូរីស ពណ៌ខៀវចាស់ ពាក់ស្លាកលេខភ្នំពេញ 2C.1042 បើកបរដោយបុរស២នាក់ ទិសដៅពីលិចទៅកើត តាមបណ្ដោយផ្លូវ៣៦០ ក្នុងល្បឿនល្មម ខណះមកដល់ផ្លូវកែង១៦៣ បានពាក់កណ្ដាលផ្លូវស្រាប់តែមានរថយន្តស៊េរីទំនើបម៉ាកស្ទារេតពណ៌ស ពាក់ស្លាកលេខ ភ្នំពេញ 2AE.0612 បើកទិសដៅពីជើងទៅត្បួងក្នុងល្បឿនយ៉ាងលឿន ហើយបានមកបុករថយន្តតូរីស ចំកន្ទុយពេញទំហឹងបណ្ដាលឲ្យវិលកន្ទុយជិតមួយជុំនិងបានក្រឡាប់ផ្កាប់ផ្ងា រងការខូចខាតយ៉ាងដំណំ តែសំណាងហើយដែលមិនបណ្ដាលឲ្យបុរសពីរនាក់ក្នុងរថយន្តរងរបួសនោះ រីឯរថយន្តបង្កក៏បានរងការខូចខាតខាងមុខទាំងស្រុងផងដែរ។
ក្រោយពេលកើតហេតុកម្លាំងសមត្ថកិច្ចមូលដ្ឋាននិងជំនាញបានចុះមកដល់កន្លែងកើតហេតុភ្លាមៗ និងបានឲ្យភាគីទាំងសងខាងបានធ្វើការសម្របសម្រួលគ្នា ដោយភាគីខាងរថយន្តស៊េរីទំនើបស្ទារេត សងការខូចខាតទៅលើរថយន្តតូរីសទាំងស្រុង ដើម្បីបញ្ចប់រឿងនៅនិងកន្លែងកើតហេតុ ៕
ដោយ៖ ភារ៉ា ដង្កោ
