ភ្នំពេញ៖ បុរសម្នាក់វ័យប្រមាណជាង៣០ឆ្នាំបើករថយន្តសេរីទំនើបម៉ាកឡង់គ្រីស័រក្នុងល្បឿនយ៉ាងលឿនខ្វះការប្រុងប្រយ័ត្ន និងមិនគោរពច្បាប់ចរាចរណ៍ ពេលមកដល់ចំណុចផ្លូវកោងមិនបន្ថយល្បឿន បួងចង្កូតមិនទាន់បានជ្រុលបុកឡើងលើឃឿនសួនរង្វង់មូលជ្រោយចង្វារ និងបុកបង្គោលភ្លើងបំភ្លឺផ្លូវបាក់មួយដើមថែមទៀតបណ្តាលអោយមានការខូចខាតដល់ទ្រព្យសម្បត្តិសាធារណៈ ចំណែករថយន្តបានបែកកង់មុខក្រោយខាងឆ្វេងទៅមុខលែងរួច តែសំណាងល្អមិនមានអ្នករងរបួស ឬក៏មានអ្នកស្លាប់។
ហេតុការណ៍នេះបានកើតឡើងកាលពីវេលាម៉ោង24នឹងនឹង25នាទីរំលងអាធ្រាតឈានចូលថ្ងៃទី២២ ខែធ្នូ ឆ្នាំ២០១៥ ស្ថិតក្នុងភូមិគៀនឃ្លាំង សង្កាត់ជ្រោយចង្វា ខណ្ឌជ្រោយចង្វា ។
ប្រភពពត៌មានពីកន្លែងកើតហេតុបានឱ្យដឹងថា នៅមុនពេលកើតហេតុគេបានឃើញរថយន្តសេរី ទំនើបមួយគ្រឿង ម៉ាកឡង់គ្រីសស័រ ពណ៍ខ្មៅ ពាក់ស្លាកលេខ ភ្នំពេញ 2AF-7776 បើកបរដោយបុរសម្នាក់វ័យប្រមាណជាង៣០ឆ្នាំ បើកតាមបណ្តោយផ្លូវជាតិលេខ៦Aក្នុងទិសដៅពីកើតទៅលិចក្នុងល្បឿនយ៉ាងលឿនដោយមិនមានការប្រុងប្រយ័ត្ន និងមិនគោរពច្បាប់ ពេលមកដល់ចំណុចកើតហេតុដែលជាចំណុចផ្លូវកោងមិនបន្ថយល្បឿន បួងចង្កូតមិនទាន់ បានជ្រុលទៅបុកឡើងឃឿនរង្វង់មូលជ្រោយចង្វារ និងបុកបង្គោលភ្លើងបំភ្លឺផ្លូវបាក់មួយដើម ចំណែករថយន្តបង្កបានបែកកង់មុខក្រោយខាងឆ្វេងទៅមុខលែងរួច តែសំណាងល្អបង្កឱ្យនណាម្នាក់រងរបួស ឬក៏រងគ្រោះថ្នាក់ដល់អាយុជីវិត ។
ក្រោយកើតហេតុសមត្ថកិច្ចមូលដ្ឋានដែលនៅប្រចាំការក្បែរនោះបានមកអន្តរាគមន៍ភ្លាមៗដល់កន្លែងកើតហេតុ និងបានសហការជាមួយជំនាញធ្វើការវាស់វែង និងស្ទូចយកទៅរក្សាទុកនៅការិយាល័យចរាចរណ៍ជើងគោក នៃស្នងការដ្ឋាននគរបាលរាជធានីភ្នំពេញ រង់ចាំដោះស្រាយនាពេលក្រោយ។
សមត្ថកិច្ចបានអោយដឹងថា គ្រោះថ្នាក់ចរាចរណ៍ខាងលើនេះបណ្តាលមកពីការបើកបរខ្វះការប្រុងប្រយ័ត្ន និងបើកលឿនមិនគោរពច្បាប់ចរាចរណ៍ទើបបង្កអោយមានគ្រោះថ្នាក់យ៉ាងដូចនេះ តែសំណាងហើយដែលមិនបង្កអោយមានអ្នករងរបួសឬក៏មានអ្នកស្លាប់នោះ ដោយគ្រាន់តែរងការខូចខាតទ្រព្យសម្បត្តិផ្ទាល់ខ្លួននិងសម្បត្តិសាធារណៈតែប៉ុណ្ណោះ ៕
ដោយ៖ ព្រែកជ័យ
