ខេត្ដកំពត៖ ប្រជាពលរដ្ឋដែលរស់នៅ តំបន់រមណីយដ្ឋានភ្នំកំពង់ត្រាច ឋិត នៅក្នុងឃុំកំពង់ត្រាច និងឃុំអង្គរសុភី ស្រុកកំពង់ត្រាច ខេត្ដកំពត បានលើក ឡើងថា មានទីតាំងកិនថ្មទាំង៤កន្លែង កំពុងតែធ្វើឱ្យប៉ះពាល់បរិស្ថានយ៉ាងធ្ងន់ ធ្ងរដល់ការរស់នៅប្រចាំថ្ងៃរបស់ពួកគាត់ ។
លោក ហុក គឹមជឿន ប្រធានមន្ទីរ ឧស្សាហកម្ម និងសិប្បកម្មខេត្ដកំពត បានថ្លែងទទួលស្គាល់ថា ធូលីថ្មដែល បំភាយចេញពីការដ្ឋានកិនថ្មនៅទីតាំង ខាងលើបានធ្វើឱ្យប៉ះពាល់ធ្ងន់ធ្ងរដល់ បរិស្ថាន និងសុខភាពប្រជាពលរដ្ឋនៅ តំបន់នោះ ។ លោកប្រធានមន្ទីរបន្ដថា ក្នុងចំណោមសិប្បកម្មកិនថ្មទាំង ៤ទីតាំង គឺមាន៣ទីតាំងមានច្បាប់ ចំណែក១ ទីតាំងទៀតជារបស់ឈ្មោះបៀវពុំមាន ច្បាប់ ។
ប៉ុន្ដែយ៉ាងណាក៏ដោយប្រធានមន្ទីរ ឧស្សាហកម្ម និង សិប្បកម្មខេត្ដកំពតរូបនេះ នៅពុំទាន់បានបង្ហាញពីចំណាត់ការដែលមានប្រសិទ្ធភាព ដើម្បីឱ្យសិប្បកម្មកិនថ្ម ទាំងនោះគោរពច្បាប់ ការពារបរិស្ថាន និងតំបន់ទេសចរណ៍មួយនេះនៅឡើយទេ ដោយគ្រាន់តែលើកឡើងថាលោកនឹង ជំរុញបន្ថែមទៀតឱ្យពួកគេគោរពច្បាប់ ។
ការលើកឡើងរបស់លោកប្រធាន មន្ទីរឧស្សាហកម្ម និងសិប្បកម្មបានធ្វើ ឡើងបន្ទាប់ពីមានការរិះគន់ពីប្រជាពលរដ្ឋថា ទីតាំងកិនថ្មទាំងនោះបានបំពុល បរិស្ថានធ្វើឱ្យប៉ះពាល់តំបន់ទេសចរណ៍ និងសុខភាពជាពិសេសប្រព័ន្ធដកដង្ហើម របស់ពួកគាត់ ។ ជាមួយគ្នានោះក៏មាន ការតបតយ៉ាងក្រអឺតក្រទមមកវិញពី បណ្ដាម្ចាស់ការដ្ឋានទាំងនោះថាគេបាន ផ្ដល់កញ្ចប់ថវិកាទៅឱ្យក្រុមមន្ដ្រីជំនាញ និងអាជ្ញាធររួចអស់ហើយសម្រាប់សកម្មភាពកិនថ្មរបស់ពួកគេ ។
ប៉ុន្ដែបើទោះជាដូច្នេះក្ដី លោក អ៊ុំ ស៊ីណាតអភិបាលស្រុកកំពង់ត្រាចកន្លង ទៅបានថ្លែងប្រាប់ថា ទីតាំងកិនថ្មខាង លើពុំមានច្បាប់ទម្លាប់អ្វីទេ ហើយលោក ក៏មិនជាប់ពាក់ព័ន្ធរឿងរ៉ាវពុករលួយជាមួយសិប្បកម្មទាំងនោះដែរ ។
សេចក្ដីរាយការណ៍ពីប្រជាពលរដ្ឋ ថា ម្ចាស់ការដ្ឋានកិនថ្មទាំង៤ទីតាំង ខាងលើមានឈ្មោះ ទី , បារាំង , បៀវ និង ឈ្មោះណុក ។
ប្រជាពលរដ្ឋនិយាយថា ធូលីដែល ហុយចេញពីការដ្ឋានកិនថ្មទាំងនោះបាន ធ្វើឱ្យប៉ះពាល់សុខភាពប្រជាពលរដ្ឋយ៉ាង ធ្ងន់ធ្ងរ ។ អ្នកភូមិធ្លាប់រកអន្ដរាគមន៍ពី អាជ្ញាធរដែនដីដែរ តែមិនបានលទ្ធផល អ្វីទាំងអស់ ៕
ដោយ៖ ហេង នរិន្ទ្រ
