ភ្នំពេញ៖ ស្ត្រីម្នាក់ត្រូវបានប្តីប្រមឹកវាយនឹងដែកទិបចំក្បាលបណ្តាលអោយបែកហូរឈាម ហើយបានដើរទៅប្តឹងមេភូមិដើម្បីអោយជួយអត្តរាគមន៍កាលពីម៉ោង១៣និង៣០នាទី ថ្ងៃទី២២ ខែធ្នូ ឆ្នាំ២០១៥ នៅចំណុចផ្ទះជួលភូមិពោងពាយ សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ ។
ស្ត្រីដែលប្តីវាយបែកក្បាលខាងលើឈ្មោះ អាត ចិន្តា អាយុ២៤ឆ្នាំ មុខរបរនៅផ្ទះ ស្នាក់នៅផ្ទះជួល និងមានស្រុកកំណើតនៅភូមិពោងពាយ សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ ។
ចំណែកប្តីដែលវាយប្រពន្ធឈ្មោះ សុខ សុជា អាយុ២១ឆ្នាំ មុខរបរកម្មករ ស្នាក់នៅ ភូមិពោងពាយ សង្កាត់ភ្នំពេញថ្មី ខណ្ឌសែនសុខ និងមានស្រុកកំណើតភូមិកក់ ឃុំស្វាយរំពា ស្រុកស្វាយទាប ខេត្តស្វាយរៀង ។
ប្រភពនៅកន្លែងកើតហេតុបានប្រាប់ថា មុនកើតហេតុ បុរសជាប្តីបានអង្គុយផឹកស៊ីនៅមុខបន្ទប់ជួលមានគ្នា៥ទៅ៦នាក់ ក្រោយពីផឹកស៊ីស្រវឹងហើយ ខឹងបហរពន្ធស្តីអោយបន្តិចបន្តួច ក៏យកដែកទិបនៅជិតនោះមកវាយក្បាលប្រពន្ធ បណ្តាលអោយបែកឈាមស្រោចមកលើអាវជោកហើយប្តីខាងលើនៅតែអង្គុយផឹកស្រាលធ្វើមិនដឹង។
ប្រភពបានប្រាប់ទៀតថា ក្រោយកើតហេតុស្ត្រីដែលប្តីវាយខាងលើបានដើរមកផ្ទះមេភូមិប្តឹង និងអោយជួយអត្តរាគមន៍ដល់នាង ។ ភ្លាមៗនោះ ខាងកំលាំងប្រជាការពារភូមិបានសហការជាមួយប្រជាការពារសង្កាត់ភ្នំពេញថ្មី ចុះទៅដល់ផ្ទះកើតហេតុខាងលើ តែប្តីដែលបង្កហិង្សារខាងលើដឹងខ្លួនបានរត់គេចខ្លួនបាត់ ។
បើតាមសំដីមេភូមិគោកឃ្លាងបានប្រាប់ថាកន្លងមកប្តីប្រពន្ធខាងលើឧស្សាហ៍ឈ្លោះប្រកែកគ្នាណាស់ដោយស្ត្រីជាប្រពន្ធបានមកប្តឹងគាត់ដល់៦លើកមកហើយ និងធ្លាប់ចាប់ឃាត់ខ្លួនបុរសជាប្តីមក អប់រំម្តងរួចទៅហើយផងដែរ ៕
ដោយ៖ តុង សីហា
