ភ្នំពេញ៖ ឈ្មួញរកស៊ីដឹកដីប្រមាណជាង១០០នាក់បាននាំគ្នាយករថយន្តរបស់ខ្លួនរាប់សិបគ្រឿងមកធ្វើសកម្មភាពតវ៉ាដោយបិទផ្លូវជាតិលេខ២ ស្ថិតនៅចំណុចទល់មុខសង្កាត់ព្រែកកំពិសខណ្ឌដង្កោ រាជធានីភ្នំពេញ បណ្តាលឲ្យកកស្ទះចរាចរណ៍ រំខានដល់ប្រជាពលរដ្ឋក្នុងការធ្វើដំណើរទៅមុខតាមផ្លូវជាតិលេខ២ ។
ករណីនេះបានកើតឡើងកាលពីវេលាម៉ោង៩ព្រឹក ថ្ងៃទី២៣ ខែធ្នូ ឆ្នាំ២០១៥ ។ នៅចំណុចកើតហេតុ គេបានសង្កេតឃើញមានវត្តមានលោក នុត ពុទ្ធដារ៉ា អភិបាលខណ្ឌដង្កោ ចុះទៅស្តាប់ការតវ៉ា ក៏ដូចរកវិធីដោះស្រាយជាមួយក្រុមឈ្មួញទាំងនោះផងដែរ ។
ក្រុមអ្នកតវ៉ាបានទាមទារថា សុំមិនឲ្យមានការដូរចង្កូតស្តាំទៅឆ្វេងតាមគោលការណ៍របស់សមត្ថកិច្ចនោះឡើយ ។
នៅវេលាម៉ោង១១ព្រឹក ថ្ងៃ ខែ ឆ្នាំដដែល បន្ទាប់ពីមានការអន្តរាគមន៍ពីលោកអភិបាលខណ្ឌដង្កោ លោកនុត ពុទ្ធដារ៉ានោះ ក្រុមអ្នកតវ៉ាបានយល់ព្រមរំសាយការតវ៉ា ហើយបានបើកផ្លូវឲ្យមានការធ្វើចរាចរណ៍ដូចធម្មតាឡើងវិញ ៕
ដោយ៖ ភារ៉ា ដង្កោ
