ភ្នំពេញ៖ លោក ឃួង ស្រេង អភិបាលរាជធានីភ្នំពេញ នៅថ្ងៃទី២៦ ខែកក្កដា នេះបានដឹកនាំមន្រ្តីជំនាញ និង អាជ្ញាធរមូលដ្ឋាន ចុះពិនិត្យមើលសណ្តាប់ធ្នាប់សាធារណៈ និង អនាម័យ នៅជុំវិញបរិវេណ វិមានឈ្នះឈ្នះ ដើម្បីទទួលស្វាគមន៍ភ្ញៀទេសចរណ៍ជាតិ និងអន្តរជាតិ ដែលបានមកទស្សសនានៅតំបន់នោះ។
ឆ្លើយតបទៅនិងកំណើនទេសចរជាតិ និងអន្តរជាតិ ដែលបានមកទស្សនា កំសាន្តនៅក្នុងបរិវេណ វិមានឈ្នះឈ្នះ ដែលមានការកើនឡើងជាបន្តបន្ទាប់ ក៏ដូចជាប្រជាពលរដ្ឋជិតឆ្ងាយ មកកំសាន្តនៅតំបន់ជុំវិញនោះមានការកើនឡើងឥតឈប់ឈរ អភិបាលរាជធានីភ្នំពេញ បានជម្រុញឱ្យមន្រ្តីជំនាញ និង អាជ្ញាធរមូលដ្ឋាន បង្កើនការយកចិត្តទុកដាក់បន្ថែមទៀត ទៅលើបញ្ហាសន្តិសុខ សណ្តាប់សាធារណៈ និងបញ្ហា បរិស្ថាន អនាម័យ នៅជុំវិញតំបន់នោះ ឱ្យបានល្អប្រសើរថែមទៀត។
លោកបន្តថា៖ ក្រៅពីបញ្ហាសណ្តាប់ធ្នាប់ និង អនាម័យ ការដាំ និងថែទាំដើមឈើ នៅក្នុងតំបន់នេះ ក៏ជាសំណុចសំខាន់មួយ ដែលអាជ្ញាធរ និងអ្នកពាក់ព័ន្ធត្រូវយកចិត្តទុកដាក់ ជាពិសេស ត្រូវដាំជួសឡើងវិញទាំងអស់ ចំពោះដើមឈើដែលបានងាប់ទៅ ព្រោះថាបរិស្ថាន និងទេសចភាពធម្មជាតិ ក៏ជាចំណុចទាក់ទាញមួយបន្ថែមទៀត បន្ទាប់ពីគេបានទស្សនា និងស្វែងយល់ពីវិមានប្រវត្តិសាស្រ្តមួយនេះ។
លោក ឃួង ស្រេង ក៏បានរំលឹកផងដែរថា វិមានឈ្នះឈ្នះជាមជ្ឈមណ្ឌលឯកសារប្រវត្តិសាស្រ្តរបស់កម្ពុជា ជាតំបន់សិក្សាស្រាវជ្រាវរបស់អ្នកប្រវត្តិផង ក៏ជាតំបន់សក្កដានុពលទេសចរណ៍ថ្មី ដែលជាទីចាប់អារម្មណ៍របស់អ្នកទេសចរណ៍ជាតិ និងអន្តរជាតិ មកទសនសនាកំសាន្ត ក្រៅពីនេះ តំបន់នេះក៏នឹងទទួលបដិសណ្ឋារកិច្ច ចំពោះវត្តមានម្រមុខដឹកនាំប្រទេស ថ្នាក់ដឹកនាំកំពូលៗនៃបណ្តាប្រទេសជាមិត្ត មកបំពេញទស្សនកិច្ច សិក្សា ស្វែងយល់ពីកម្ពុជាផងដែរ។ ដូច្នេះនៅជុំវិញបរិវេណ វិមានឈ្នះឈ្នះ ក៏ដូចជាជុំវិញតំបន់នេះ ត្រូវតែធានាបានយ៉ាងល្អបំផុត ទាំងសន្តិសុខ សណ្តាប់ធ្នាប់សាធារណៈ បរិស្ថាន និង អនាម័យជាប់ជាប្រចាំ។
លោកបន្ដថា៖ នៅពេលខាងមុខ តំបន់នោះក៏នឹងមានកម្មវិធីជាតិធំៗ កម្មវិធីអាស៊ាន ស៊ីហ្គេម និងកម្មវិធីអន្តរជាតិសំខាន់ៗជាច្រើន ដែលនឹងត្រូវមកប្រារពធ្វើនៅក្នុងតំបន់ដ៏មានវិសាលភាពក្នុងរាជធានីភ្នំពេញមួយនេះ៕

ដោយ៖ សំរិត