ក្នុងនាមប្រជាពលរដ្ឋម្នាក់ នាងខ្ញុំហាក់ដូចជាខ្វល់ខ្វាយយ៉ាងខ្លាំងអំពីបញ្ហាសន្តិសុខ សណ្តាប់ធ្នាប់ ជាពិសេសករណីចោរប្លន់ប្រដាប់អាវុធមួយរយៈកន្លងមកនេះ ។ បើតាមសម្តេចតេជោនាយករដ្ឋមន្ត្រី មូលហេតុខ្លះដែលនាំឲ្យមានអំពើប្លន់កើតឡើង ដោយសារតែពួកចោរត្រូវបានដោះលែងចេញពីគុក ។ ជាមួយគ្នានេះ លោករដ្ឋមន្ត្រីក្រសួងយុត្តិធម៌ ក៏បានព្រលយឲ្យដឹងដែរថា ក្រុមចោរដែលធ្វើសកម្មភាពប្លន់នាគ្រាចុងក្រោយនេះ គឺបានបញ្ជាតាមទូរស័ព្ទចេញពីពន្ធនាគារខេត្តកណ្តាល ។ តើប្រសាសន៍របស់លោករដ្ឋមន្ត្រីត្រឹមត្រូវឬទេដែលថា ទណ្ឌិតនៅក្នុងពន្ធនាគារមានទូរស័ព្ទប្រើប្រាស់?
ករណីដែលបានកើតឡើង នាងខ្ញុំគិតថា វាមិនមែនសម្តៅតែទៅលើពន្ធនាគារខេត្តកណ្តាល១នោះទេ ។ ក្រុមចោរភាគច្រើនដែលធ្វើសកម្មភាពលួចឆក់ ប្លន់ គឺមានអតីតភាពជាអ្នកធ្លាប់ជាប់ពន្ធនាគារ ។ ដូច្នេះ គេអាចប្រព្រឹត្តអំពើប្លន់បន្តទៀតក្រោយចេញពីគុក ។ មានន័យថា ពន្ធនាគារ មិនបានដុសខាត់ស្មារតី អារម្មណ៍ ហាត់ពត់លត់ដំប្រែក្លាយមនុស្សពីអាក្រក់ឲ្យទៅជាល្អនោះឡើយ ។ មុនចេញពីគុកគឺជាចោរឆក់តាមផ្លូវសាធារណៈក្នុងក្រុង ។ ពេលចេញពីគុក ក៏ធ្វើសកម្មភាពខ្លាំងលើសដើម គឺចងក្រងបក្ខពួក ដើរប្លន់តែម្តង ។
អ្នកដែលជាប់គុកហើយចេញមកកែប្រែមានតិចតូចបំផុត អាស្រ័យដោយបទល្មើស ។ បទល្មើសដែលបង្កឲ្យប៉ះពាល់ដល់សន្តិសុខសង្គម ករណីលួចឆក់ ប្លន់, ប្រើប្រាស់គ្រឿងញៀនកម្រនឹងឃើញអតីតទណ្ឌិត ឬពិរុទ្ធជនអាចកែប្រែទង្វើរបស់ខ្លួនបានណាស់ ។ មានន័យថា ពួកគេចេញពីពន្ធនាគារមប្រព្រឹត្តអំពើល្មើសច្បាប់ដដែល ។ តើការដោះដូរមន្ត្រីពន្ធនាគារអាចរួមចំណែកពង្រឹងឲ្យការអនុវត្តច្បាប់បានប្រសើរឡើងទេ? និយាយឲ្យខ្លី តើអាចឲ្យអ្នកជាប់ទោសផ្លាស់ប្តូរគំនិតពីអាក្រក់មកល្អបានទេ? ៕
ដោយ៖ ប្រជាពលរដ្ឋម្នាក់
