ភ្នំពេញ៖​ ស្ត្រីជនជាតិបរទេសម្នាក់បានរងរបួសរលាត់ដៃជើង​ ដោយសារតែក្រុមជនសង្ស័យមានគ្នាបីនាក់ជិះម៉ូតូពីរគ្រឿងបានធ្វើសកម្មភាពឆក់កាបូបពេលដែលកំពុងដើរបណ្ដាលអោយដួល​តែមិនបានសម្រេច ហើយក្រុមជនសង្ស័យជិះម៉ូតូរត់គេចខ្លួនបាត់ ។

ហេតុការណ៍នេះបានកើតឡើងកាលពីវេលាម៉ោង២៣ និង៤៥នាទីយប់ថ្ងៃទី២៤​ ខែធ្នូ​ ឆ្នាំ២០១៥​ តាមបណ្ដោយផ្លូវព្រះសីុសុវត្តិ​ នៅចំណុចមុខវត្ត​ ឧណាឡោម​ ស្ថិតក្នុងសង្កាត់ជ័យជំនះ​ ខណ្ឌដូនពេញ ​។

ប្រភពព័ត៌មានពីប្រជាពលរដ្ឋដែលនៅជិតកន្លែងកើតហេតុបានអោយដឹងថា​ មុនពេលកើតហេតុគេឃើញស្ត្រីជនជាតិបរទេសម្នាក់បានដើរតាមបណ្ដោយផ្លូវព្រះសីុសុវត្តិ​ ពេលមកដល់ចំណុចកើតហេតុមានជនសង្ស័យមួយក្រុមមានគ្នាបីនាក់ជិះម៉ូតូឌ្រីមសង់មួួយគ្រឿង និងម៉ូតូធន់ធំមួួយគ្រឿងមិនចាំស្លាកលេខបានជិះមកជិតហើយឆក់កាបូបពីស្ត្រីជនជាតិបរទេសបណ្ដោយអោយស្ត្រីជនបរទេសដួលទៅនឹងថ្នល់រងបួស​ តែជនសង្ស័យឆក់កាបូបមិនបានសម្រេចនោះទេ ។

ប្រភពដដែលបានបន្តថា​ ក្រោយពីធ្វើសកម្មភាពឆក់រួច ហើយក្រុមជនសង្ស័យបាននាំគ្នាជិះម៉ូតូរត់គេចខ្លួនបាត់។ ចំណែកជនរងគ្រោះត្រូវបានគេបញ្ជូនទៅព្យាបាលរបួសនៅមន្ទីរពេទ្យ ៕

ដោយ៖ ព្រែកជ័យ