ភ្នំពេញ ​៖​ ជនសង្ស័យមួយក្រុមបានចូលធ្វេីសកម្មភាពផ្លោះរបងឃ្លាំងស្តុបទំនិញមួយកន្លែង គាស់ទ្វារលួច លុយអស់ចំនួន៣០០ដុល្លាររួចគេចខ្លួនបាត់ដោយសុវត្តិភាព ។ ករណីនេះបានបង្កការភ្ញាក់ផ្អេីលកាលពីវេលាម៉ោង៨ព្រឹក ថ្ងៃទី១៥ ខែសីហា ឆ្នាំ២០១៩  នៅឃ្លាំងស្តុកឥវ៉ាន់ តាមមហាវិថីឈ្នះ=ឈ្នះ ភូមិត្រពាំងពោធិ សង្កាត់ ចោមចៅ៣ ខណ្ឌពោធិ៍សែនជ័យ ។

ប្រភពព័ត៌មានពីមេការបានរៀបរាប់ឲ្យដឹងថា ទីតាំងឃ្លាំងខាងលើ ស្តុកទំនិញមកពីប្រទេសជប៉ុន ហើយរាល់ថ្ងៃយប់ សន្តិសុខ មានយាមតែខាងមុខ ខាងក្រោយរបងជុំវិញ ការងារធ្វើតែពេលថ្ងៃ យប់ឡើងបិទទ្វារ ហើយនៅព្រឹកថ្ងៃ១៥នេះ ខណ:ដែលបុគ្គលិក នាយកក្រុមហ៊ុន មកចូលធ្វើការស្រាប់តែ ឃើញទ្វារឃ្លាំង ទ្វារការិយា​ល័យ ត្រូវបានជនសង្ស័យគាស់របើកផ្តាច់សោចោល កាមេរ៉ាសុវត្តិភាពកាច់ បង្វែរខុសគោលដៅ ប្រព័ន្ធការ​ពារ សុវត្តិភាពស៊ីរ៉ែនកាត់ផ្តាច់ខ្សែចោល ។

តាមការពិនិត្យលើកាមេរ៉ាសុវត្តិភាព ឃើញថា ជនសង្ស័យ មានគ្នា៣នាក់ ពាក់ម៉ាស និងពាក់មួកសុវត្តិភាព បានផ្លោះរបងចូលធ្វើសកម្មភាពនៅវេលាម៉ោង១ និង៤៣នាទីរំលងអធ្រាត្រ ឆ្លងចូលថ្ងៃទី១៥ ខែសីហា ឆ្នាំ២០១៩ ។

តាមការអះអាងពីមេការថា  ក្រោយរួមសហការជាមួយកម្លាំងសមត្ថកិច្ចត្រួតពិនិត្យជាក់ស្តែងឃើញថា ជនសង្ស័យចូលធ្វើសកម្មភាព ក្នុងបន្ទប់ការិយាល័យ លួចយកលុយក្នុងថតតុអស់៣៥០ដុល្លារ ។ រីឯឃ្លាំង ស្តុក​ឥវ៉ាន់ មានទ្វារមួយជាន់ទៀត មិនមានបាត់បង់ឡើយ ។

តែទោះជាយ៉ាងណាក្តី ករណីខាងលើខូចខាតទ្វារអស់២ លុយអស់៣៥០ដុល្លារ កាត់ខ្សែសុវត្ថិភាព កាមេរ៉ាសុវត្តិភាព កាច់បង្វែរខុសទិសដៅ តំណាងក្រុមហ៊ុន ប្តឹងសមត្ថកិច្ចឲ្យបន្តជួយស្រាវជ្រាវ មុខសញ្ញាលួចខាងលើ ៕សុខាសែនជ័យ​