ខេត្តស្វាយរៀង៖ បុរសដែលគេស្គាល់ថាជាមេប៉ុស្តិ៍ឃុំត្រស់ម្នាក់បានស្លាប់ភ្លាមៗនឹងកន្លែងខណៈដែលជិះម៉ូតូក្នុងល្បឿនលឿនមិនប្រុងប្រយ័ត្នណាមួយយប់ងងឹតទៅបុកពីក្រោយកាឡេថងកន្ត្រៃដៃវែងយ់ាងពេញទំហឹង កាលពីវេលាម៉ោង៧យប់ថ្ងៃទី២៤ ខែធ្នូ ឆ្នាំ២០១៥ត្រង់ចំនុចភូមិឈើភ្លើង ឃុំកំពង់ត្រាច ស្រុករមាសហែក ។

យោងតាមសមត្ថកិច្ចនគបាលស្រុករមាសហែកបានអោយដឹងថា ជនរងគ្រោះដែលស្លាប់មានឈ្មោះ នេត សុវណ្ណ អាយុ៤៧ឆ្នាំបម្រើការងារជានាយប៉ុស្តិ៍នគរបាលរដ្ឋបាលត្រស់ នៅភូមិត្រពាំងត្បាល់ ឃុំមុខដា ស្រុករមាសហែក បើកម៉ូតូម៉ាកYAMAHA ពណ៍ទឹកដោះគោ ពាក់ស្លាកលេខ ន-ប១-៦៧៧៣ ខូខខាតយ៉ាងដំណំ ។ រីឯអ្នកបើក កាឡេថងកន្ត្រៃដៃវែងត្រូវបានស្គាល់ឈ្មោយិន សាឃន ភេទប្រុស អាយុ៣៣ឆ្នាំមុខរបរកសិករភូមិរមៀត ឃុំមុខដា ស្រុករមាសហែក ក្រោយកើតហេតុបានរត់គេចខ្លួនភ្លាមៗ ។

តាមសាក្សីបានអោយដឹងថា មុនពេលកើតហេតុគេឃើញបុរសម្នាក់បានបើកកាឡេថងកន្ត្រៃដៃវែង ពណ៍ក្រហមកម្លាំង១២សេះ ម៉ាកគូបូតាធ្វើដំណើរពីទិសខាងកើតទៅលិចដឹកដើមអាកាស្យាពេញស្របពេលនោះស្រាប់តែមានម៉ូតូមួយគ្រឿងធ្វើដំណើរពីកើតមកលិចស្របទិសគ្នាបុកពីក្រោយយ៉ាងពេញទំហឹងលាន់សូដូចរន្ទះបណ្ដាលអោយបុរសដែលជិះម៉ូតូស្លាប់ភ្លាមៗនឹងកន្លែងតែម្ដង ។ ក្រោយពីកើតហេតុអ្នកបើកកាឡេថងក៏បានរត់គេចខ្លួនបាត់ស្រមោលផងដែរ ។

សមត្ថកិច្ចនគរបាលបន្តថា មូលហេតុគឺអ្នកបើកម៉ូតូបានប្រើប្រាស់ល្បឿនលឿនខ្វះការប្រុងប្រយ័ត្នទើបបណ្ដាលទៅបុកកាឡេថងពី
ក្រោយបែបនេះ ៕