ភ្នំពេញ៖ ជនជាប់ចោទអតីតឧកញ៉ាសុខ ប៊ុន ជាសេដ្ឋីអចលនទ្រព្យមួយរូប ប៉ុន្តែមិនមានសេចក្តីថ្លៃថ្នូរបានប្រើអំពើដ៏សាហាវឃោរឃៅវាយធ្វើបាបទៅលើកញ្ញា សាសា អតីតពិធីការិនីទូរទស្សន៍កាលពីខែកក្កដា ឆ្នាំ២០១៥ និងបញ្ជាឲ្យអង្គរក្សរបស់ខ្លួនបាញ់សម្លាប់ ក៏ដូចជាអំពើព្រៃផ្សៃវាយ លោតធាក់ និងចាប់សម្រាតផ្អើលពាស់ពេញប្រទេស ត្រូវបានគេដឹងថា កំពុងដាក់ពាក្យសុំនៅក្រៅឃុំ ដើម្បីព្យាបាលជំងឺ ។
បើតាមការអះអាងពីមេធាវីតំណាងឲ្យជនជាប់ចោទប្រាប់កាសែតក្នុងស្រុកថា ការដាក់ពាក្យស្នើសុំនៅក្រៅឃុំ ដោយសារកូនក្តីរបស់ខ្លួនមានបញ្ហាសុខភាព ជំងឺ បណ្តាលមកពីអារម្មណ៍តានតឹង និងជំងឺលើសឈាម ក្នុងនោះ លោកមេធាវី យិន សុធី បានដាក់សំណើសុំផ្ទេរជនជាប់ចោទសុខ ប៊ុន ពីមន្ទីរសម្រាកព្យាបាលជំងឺនៃពន្ធនាគារព្រៃស មកមន្ទីរពេទ្យខាងក្រៅ ប៉ុន្តែ ការស្នើសុំនេះ លោក លាង សំណាត ចៅក្រមស៊ើបសួរក្នុងរឿងក្តីនេះ នៅមិនទាន់ឆ្លើយតបនៅឡើយទេ និងមិនទាន់បិទការស៊ើបអង្កេតផងដែរ ។
ទង្វើដ៏ព្រៃផ្រៃរបស់ជនជាប់ចោទ សុខ ប៊ុន វាយប្រហារទាត់ធាក់ បោចសក់ ចាប់សម្រាត និងបញ្ជាឲ្យអង្គរក្សរបស់ខ្លួនបាញ់សម្លាប់ កុំថាឡើយតែ មជ្ឈដ្ឋានប្រជាពលរដ្ឋ សមត្ថកិច្ច និងមន្ត្រីរាជការ ក្នុងនោះ សូម្បីតែសម្តេចតេជោ នាយករដ្ឋមន្ត្រី ក៏បានប្រតិកម្ម និងជំរុញឲ្យស្ថាប័នតុលាការបន្តនីតិវិធីរបស់ខ្លួន ប្រយោជន៍ផ្តល់ភាពយុត្តិធម៌សម្រាប់ជនរងគ្រោះគឺកញ្ញា សាសា ។
អំពើដ៏ឃោរឃៅនេះ ទាំងកញ្ញា សាសា និងឪពុកម្តាយ ផងដែរ ពុំបានទាមទារសំណងណាមួយពីជនល្មើសដោយសំណូមពរឲ្យតុលាការធ្វើតាមនីតិវិធី ។
ជនជាប់ចោទអតីតឧកញ៉ា សុខ ប៊ុន ត្រូវបានគេចាត់ទុកថា ជាជ្នកមានស្តុកស្តម្ភមួយរូបនៅប្រទេសកម្ពុជា ប៉ុន្តែបាត់បង់នូវសេចក្តីថ្លៃថ្នូរដ៏ធំធេង បន្ទាប់ពីគាត់បានប្រើអំពើហិង្សាទៅលើកញ្ញា សាសា គ្រាដែលជនរងគ្រោះការពារមិត្តភក្តិរបស់ខ្លួនដែលជានារីជនជាតិជប៉ុន ប្រឈមនឹងការរងគ្រោះដោយសុខ ប៊ុន ចាប់រំលោភ ក្នុងនោះ មុនពេលកើតហេតុ អតីតឧកញ៉ា សុខ ប៊ុន បានប្រើអំពើហិង្សាមកលើនារីជនជាតិជប៉ុន ដែលជាមិត្តភក្តិរបស់ កញ្ញា សាសា ធ្វើឲ្យនាងស្រែកទ្រហ៊ោយំ និងសុំឲ្យមានការជួយអន្តរាគមន៍ឲ្យរួចផុតពីកណ្តាប់ដៃជនល្មើស និងពីសេដ្ឋីព្រាននារី ។ ការជួយអន្តរាគមន៍ពីកញ្ញា សាសា ទើបធ្វើឲ្យសុខ ប៊ុន ផ្ទុះនូវកំហឹង ចេញមកវាយធ្វើបាប ទាត់ធាក់ ទះកំផ្លៀង បោចសក់ យកជើងធាក់ទម្រាំលើដើមទ្រូង ចាប់សម្រាត និងបញ្ជាឲ្យអង្គរក្សរបស់ខ្លួនដកកាំភ្លើងបាញ់សម្លាប់ ។ កញ្ញា សាសា បានរួចផុតពីគ្រោះថ្នាក់ អាចជាសំណាងមួយក្នុងមួយពាន់គ្រោះថ្នាក់ ហើយអ្វីដែលសមត្ថកិច្ច និងតុលាការមានចំណាត់ការចាប់ជនល្មើស ដាក់ឃុំបណ្តោះអាសន្នមកទល់នឹងពេលនេះ ពិតជាមានការគាំទ្រ និងចាត់ទុកថា កំណែទម្រង់ប្រព័ន្ធតុលាការកំពុងតែមាននិរន្ទរភាព ។
គេមានជំនឿថា តាមរយៈអង្គហេតុរបស់សកម្មភាពសុខ ប៊ុន ពិតជាមិនអាចចៅក្រមអនុញ្ញាតឲ្យនៅក្រៅឃុំនោះបានឡើយ ។
ពាក់ព័ន្ធនឹងករណីនេះ នគរវត្តមិនអាចទាក់ទងបានទេពីមេធាវីការពារជនជាប់ចោទអតីតឧកញ៉ា សុខ ប៊ុន កាលពីរសៀលថ្ងៃទី២៦ ខែធ្នូ ឆ្នាំ២០១៥ ដោយពុំមានលេខទូរស័ព្ទ ប៉ុន្តែសមត្ថកិច្ចបាននិយាយថា ការលើកហេតុផលពីបញ្ហាជំងឺរបស់ជនជាប់ចោទករណីខ្លះគ្រាន់តែជានីតិវិធីដើម្បីឲ្យមានការយល់ព្រមដោយចៅក្រមស៊ើបសួរប៉ុណ្ណោះ ប៉ុន្តែមានជនជាប់ចោទជាច្រើនមិនអាចត្រូវបានអនុញ្ញាតឲ្យទៅព្យាបាលជំងឺនៅខាងក្រៅគេចផុតពីរង្វង់សមត្ថកិច្ចរបស់មន្ត្រីពន្ធនាគារការពារនោះឡើយ ដូច្នេះ អ្វីដែលចៅក្រមស៊ើបសួរ មិនអនុញ្ញាតឲ្យទៅសម្រាកព្យាបាលនៅខាងក្រៅពន្ធនាគារ អាចនឹងមានមូលកភាព ត្រឹមត្រូវ ៕
ដោយ៖ សុខ ខេមរា
