ខេត្តកណ្តាល៖ ស្ត្រី២នាក់បងប្អូនបង្កើត និងក្មួយស្រីម្នាក់ទៀតបានជិះម៉ូតូឌុបគ្នាត្រឡប់មកពីយកធាតុឪពុកចាក់ចូលក្នុងទឹកទន្លេបម្រុងទៅហូបបាញ់ឆែវ ខណៈនោះក៏ត្រូវក្រុមចោរជិះម៉ូតូតាមឆក់កាបូបបណ្តាលឲ្យម៉ូតូទាំង២គ្រឿងដួលនៅលើផ្លូវ ។ ភ្លាមៗនោះកម្លាំងប្រជាការពារបានចេញអន្តរាគមន៍ ឃាត់ខ្លួនជនសង្ស័យប្រគល់ឲ្យសមត្ថកិច្ចនគរបាលក្រុងតាខ្មៅចាត់ការតាមនីតិវិធីច្បាប់ ។

ករណីឆក់កាបូបមិនបានសម្រេចនេះបានកើតឡើង កាលពីវេលាម៉ោង១៦ និង១០នាទី ថ្ងៃទី២៥ ខែធ្នូ ឆ្នាំ២០១៥ នៅលើកំណាត់ផ្លូវជាតិលេខ២១A ស្ដិតក្នុងភូមិព្រែកសំរោង សង្កាត់តាខ្មៅ ក្រុងតាខ្មៅ ខេត្តកណ្តាល ។

ជនសង្ស័យដែលត្រូវបានកម្លាំងប្រជាការពារឃាត់ខ្លួន ប្រគល់ឲ្យនគរបាលក្រុងតាខ្មៅនោះទី១-ឈ្មោះ ផេង ឧត្តមបូទី ហៅឧត្តម ភេទប្រុស អាយុ១៩ឆ្នាំ ជនជាតិខ្មែរ មុខរបរមិនពិតប្រាកដ ២-ឈ្មោះ រិទ្ធ ឧត្តម ភេទប្រុស អាយុ២០ឆ្នាំ មុខរបរមិនពិតប្រាកដ ។ ជនសង្ស័យទាំង២នាក់នេះមានទីលំនៅក្នុងភូមិលេខ៥ ឃុំស្វាយរលំ ស្រុកស្អាង ខេត្តកណ្តាល ជិះម៉ូតូមួយគ្រឿងម៉ាកស៊ុយហ្ស៊ូគីនិច ពណ៌ខ្មៅលាយផ្កាឈូក ស៊េរីឆ្នាំ២០១៣ ពាក់ស្លាកលេខភ្នំពេញ1BQ-3588 ដើម្បីធ្វើសកម្មភាពឆក់កាបូបពីជនរងគ្រោះ ។ ចំណែកឯស្ត្រីរងគ្រោះ ទី១-ឈ្មោះ ជិន សុភាព ភេទស្រី អាយុ៣៦ឆ្នាំ មុខរបរ លក់ដូរ ទី២-ឈ្មោះ ជិន ផលគុណ ភេទស្រី អាយុ៣២ឆ្នាំ មុខរបរនៅផ្ទះ និងទី៣-ឈ្មោះ ឃីម មុន្នីរតនា ភេទស្រី អាយុ១៨ឆ្នាំ ជនជាតិខ្មែរ មុខរបរនៅផ្ទះ ។ ជនរងគ្រោះជាបងប្អូនបង្កើត និងជាក្មួយ មានទីលំនៅក្នុងភូមិដើមមៀន សង្កាត់តាខ្មៅ ក្រុងតាខ្មៅ ខេត្តកណ្តាល ។

ស្ត្រីរងគ្រោះបានឲ្យដឹងថា នៅមុនពេលកើតហេតុពួកគេទាំង៣នាក់បងប្អូន និងក្មួយស្រីជិះម៉ូតូឌុបគ្នាយកធាតុឪពុកទៅចាក់នៅលើស្ពានព្រែកសំរោង ចូលក្នុងទឹកទន្លេបាសាក់ ។ ក្រោយពីចាក់ធាតុចូលក្នុងទឹកទន្លេហើយនោះ ក៏បានជិះម៉ូតូឌុបគ្នាក្នុងគោលបំណងទៅហូបនុំបាញ់ឆែវ ខណៈកំពុងជិះម៉ូតូតាមបណ្តោយផ្លូវជាតិលេខ២១A ស្រាប់តែមានជនសង្ស័យ២នាក់ខាងលើនេះជិះម៉ូតូមកអែបរួចធ្វើសកម្មភាពឆក់កាបូបស្ពាយ បណ្តាលឲ្យម៉ូតូរបស់ខ្លួនកំពុងជិះនិងម៉ូតូជនសង្ស័យដួលទៅលើផ្លូវជាតិ ។ ភ្លាមៗនោះក៏មានកម្លាំងប្រជាការពារចេញមកអន្តរាគមន៍ឃាត់ខ្លួនជនសង្ស័យទាំង២នាក់ ប្រគល់ឲ្យនគរបាលក្រុងតាខ្មៅយកទៅកសាងសំណុំរឿងចាត់ការតាមច្បាប់ ៕

ដោយ៖ ស្អាងជ័យ