អគ្គលេខាធិការអង្គការសហប្រជាជាតិ លោកបាន គីមូន បានកោតសរសើរចំពោះមេដឹកនាំកូរ៉េខាងត្បូង និងជប៉ុន កាលពីថ្ងៃទី២៨ ខែធ្នូ ឆ្នាំ២០១៥ ចំពោះការយល់ព្រមចរចារកដំណោះស្រាយបញ្ជប់ជម្លោះទាក់ទងស្ត្រីកូរ៉េខាងត្បូងត្រូវកម្លាំងទាហានជប៉ុនបង្ខំឲ្យធ្វើស្រីបនក្នុងអំឡុងសម័យសង្គ្រាមលោកលើកទី២នោះ ។
លោក បាន គីមូន បានប្រកាសស្វាគមន៍ចំពោះកិច្ចព្រមព្រៀង បន្ទាប់ពីការពិភាក្សារវាងរដ្ឋមន្ត្រីការបរទេសជប៉ុន នឹងកូរ៉េខាងត្បូងនៅទីក្រុងសេអ៊ូល ហើយលោកបានដាក់ក្តីសង្ឃឹមថា នឹងមានការចូលរួមបង្កើតទំនាក់ទំនឲ្យកាន់តែស្អិតល្មួតថែមទៀតរវាងប្រទេសកូរ៉េខាងត្បូង នឹងជប៉ុននៅក្នុងពេលអនាគត ។
អ្នកនាំពាក្យរបស់អគ្គលេខាធិការអង្គការសហប្រជាជាតិបានចេញសេចក្តីថ្លែងការណ៍មួយដោយបញ្ជាក់ថា លោកអគ្គលេខាធិការអង្គការសហប្រជាជាតិសម្តែងការអបអរចំពោះប្រធានាធិបតីនៃសាធារណរដ្ឋកូរ៉េខាងត្បូង លោកស្រីផាក យុងហេ និងលោកនាយករដ្ឋមន្ត្រីជប៉ុន ស៊ីនហ្សូ អាបេ ចំពោះចក្ខុវិស័យក្នុងទំនាក់ទំនងឲ្យកាន់តែល្អប្រសើររវាងប្រទេសទាំងពីរ ។
ស្ថិតនៅក្នុងកិច្ចព្រមព្រៀង ប្រទេសជប៉ុនបានយល់ព្រមសុំទោស និងផ្តល់សំណងជាទឹកប្រាក់ប្រមាណ៨.៣លាន ដុល្លារចំពោះស្ត្រីកូរ៉េខាងត្បូងដែលត្រូវបង្ខិតបង្ខំឲ្យធ្វើជាទាសករផ្លូវភេទនោះ ។
ជាអតីតរដ្ឋមន្ត្រីក្រសួងការបរទេសកូរ៉េខាងត្បូងនោះ លោកបាន គីមូន បានថ្លែងបញ្ជាក់ថា ប្រទេសនៅតំបន់អាស៊ីភាគអគ្នេយ៍ត្រូវតែកសាងទំនាក់ទំនងមិត្តភាព ដោយផ្អែកលើការទទួលស្គាល់ប្រវត្តិសាស្ត្រ ។
ជោគវាសនាស្ត្រីរងគ្រោះទាំង៤៦នាក់ដែលរស់រានមានជីវិតរហូតមកដល់សព្វថ្ងៃនេះគឺជាបញ្ហាមួយយ៉ាងរសើបបំផុតនៅក្នុងប្រទេសកូរ៉េខាងត្បូង ។ បញ្ហានេះបានរារាំងដល់ចំណងមិត្តភាពរាប់ទសវត្សរ៍មកហើយរវាងប្រទេសអតីតជាអ្នកធ្វើអាណានិគមន៍នោះ ។
លោកស៊ីនហ្សូ អាបេ បានថ្លែងទៅកាន់ក្រុមអ្នកកាសែតនៅទីក្រុងតូក្យូបន្ទាប់ពីការសន្ទនាតាមទូរស័ព្ទជាមួយលោកស្រីផាក យុងហេថា ប្រទេសទាំងពីរ «នឹងស្វាគមន៍ការចូលដល់យុគសម័យថ្មី» ។
ស្ត្រីរហូតដល់២០០.០០០នាក់ ភាគច្រើនជាពលរដ្ឋកូរ៉េខាងត្បូងត្រូវគេប៉ាន់ស្មានថាបានទទួលរងការបង្ខិតបង្ខំឲ្យធ្វើជាស្រីបនដោយកងកម្លាំងទាហានជប៉ុនអំឡុងសម័យសង្គ្រាមលោកលើកទី២ ។
ជប៉ុនបានអះអាងថា ជម្លោះរបស់ខ្លួនជាមួយកូរ៉េខាងត្បូងទាក់ទងបញ្ហាខាងលើនេះត្រូវបានដោះស្រាយរួចរាល់ហើយតាមរយៈកិច្ចព្រមព្រៀងធ្វើឡើងក្នុងឆ្នាំ១៩៦៥ ដោយទីក្រុងតូក្យូបានបង្កើតស្ថានទូតនៅកូរ៉េខាងត្បូង និងព្រមចំណាយទឹកប្រាក់៨០០លានដុល្លារជាប្រាក់កម្ចី អត់សំណងទៅឲ្យកូរ៉េ ។ ជប៉ុនបានធ្វើអាណានិគមន៍លើកូរ៉េខាងត្បូងចាប់ពីឆ្នាំ១៩១០រហូតដល់ឆ្នាំ១៩៤៥ ។
រដ្ឋមន្ត្រីក្រសួងការបរទេសជប៉ុន លោក Fumio Kishida ការផ្តល់ថវិកា១លានវ័ន(won) មិនមែនជាសំណងនោះឡើយ ប៉ុន្តែជាគោលដៅស្តារឡើងវិញនូវសេចក្តីថ្លៃថ្នូររបស់ស្ត្រីភេទ ៕
ប្រែសម្រួល៖ ថាច់ យ៉ាត
